【外語930】《世紀戰疫》我們從沙士學到什麼?

隨住武漢新型肺炎擴散至多個國家,世衛終於宣佈將疫情列為國際公共衛生緊急事件,各地亦有唔同應對措施,例如意大利就宣布停飛來往中國航線。而普羅大眾除咗周圍撲口罩同消毒用品外,連有關傳染病嘅節目或電影都重回大家視線,其中2011年由史堤芬蘇德堡執導嘅《世紀戰疫》,分別重新登上美國、英國itunes榜第10及第29位。

《世》以SARS為藍本,講述一種傳播性極強、經空氣傳播嘅致命病毒爆發,隨住疫情一發不可收拾,世界各地嘅醫療專家都在爭分奪秒尋求治療方法,當中又牽涉不少政治因素,例如為避免引起公眾恐慌而對外宣佈痛毒嘅毒性、醫生ErIn(Kate Winslet飾)努力防止病情傳播設立隔離房間,結果換嚟官員冷冷一句無預算建隔離營!

而且生死面前人人自保,村民為求疫苗而綁架嘅病毒專家Leonora(Marion Cotillard飾),明知成村都係老弱婦儒,但為咗贖人竟然以興奮劑代疫苗,仲理直氣壯話唔會同屈服於綁架者,仲未計戲內一眾有關係人士優先獲發疫苗!僵化又自私嘅官療阻礙控制疫情外,最受害始終係一眾醫護及平民。

普羅大眾因為疫苗不足大打出手,有病無人理,高官們無病則獲派解藥!遭封城但連糧食都不足以俾受困居民,結果平民如Mitch(Matt Damon飾)只能自行解救,以槍傍身,謝絕任何接觸以保護女兒。

當大家經歷過03年沙士一役後,以為面對疫情會有更好防護措施,結果政府應對比03年更不堪。中門大開外連醫護人員嘅保護衣物如口罩等供應都不足,一般市民更一罩難求,冷風排隊撲口罩,最過份係當社會不安時,總係有一如《世》片中立心不良嘅Alan (Jude Law飾)繼續造謠、製造恐慌後,聲稱服食連翹康復而從中獲利!

《世》於香港取景,仲有徐天佑同何超儀參與演出。事隔數年再重溫,情景與今日香港何其相似,睇完份外憂傷,政府後知後覺或者明知故犯零對策,唯獨慶幸香港仲有一堆有心人,出力幫助香港市民以成本價提供口罩,香港人千祈唔好失去互助精神!香港,加油!