外傭欠債劈炮 孫慧雪收恐嚇電話最驚追上門

東方日報

宅男女神孫慧雪遭恐嚇「追債」!原來她聘用的外籍家傭為避債而請辭,不知情的她之後收到追債電話及信件,即使已向財務公司解釋,仍飽受騷擾,令她不勝其煩!

孫慧雪昨日凌晨在社交網吐苦水,指外傭突然請辭,不料對方離開後,她即收到追債電話,才知外傭因欠債而「走佬」!她上載財務公司追債信,留言:「我工人姐姐突然請辭,話要返鄉下,我想請佢幫多幾日手都唔肯,佢一走咗之後,追債電話就打嚟,又收恐嚇信,即刻明晒點解對佢咁好都要走。我之前仲猛咁諗係咪辛苦咗佢!」

對待外傭如家人一樣的孫慧雪表示,曾向對方提供金錢協助:「佢之前話有困難,我哋仲借咗筆錢畀佢!唉!佢明知我哋屋企有小朋友都咁樣,真係好過分,可以點解決?」她更訴苦「人善被人欺,點解我成日遇到呢啲嘢」,又表示這星期要親自照顧2歲大的兒子Riley。

發文狂呻後,孫慧雪獲不少網友安慰並提供意見,同時亦有過來人分享經驗,有網友建議她向財務公司解釋便可,但她說:「佢問我哋攞封termination contract(中止合約證明),已經send咗,仲繼續騷擾!」又指該家傭疑似已找到另一份工。她表示在僱傭中心聘用該外傭時,對方曾說明願意照顧小孩,她說:「但請咗返嚟又話唔會照顧小朋友!」

暫時未報警

孫慧雪接受本報電話訪問,表示暫時未報警:「我哋大約收到兩個(財務公司)電話,第二個電話已經同佢講個姐姐唔喺度做,佢叫我畀證明,已經畀咗,但又收到多一封,我諗佢哋處理緊啩!聽人講如果畀咗證明信,就唔再追究。希望佢哋唔好上門,因為我朋友試過咁嘅情況,畀晒嘢(證明)都照每日上門拍門同埋拎油漆,我朋友要好惡咁同佢哋講,話唔關佢事,先至平息到。」