【壓力爆煲】黃建東疑患暴食症:我控制唔到自己

做藝人壓力大就係人都知,就好似2011年參選香港先生嘅黃建東(Derek)當年雖然贏得「最具演藝潛能大獎」,不過可惜其後無綫都冇咩俾機會佢發展。簡單嚟講,出到街,你可能會認得佢個樣,不過佢個名你就未必知道。而無綫人工唔高就係眾所周知,所以黃建東就決定靠自己能力拍咗一段港版《PPAP》,希望獲得更多關注。點知真係俾佢爆紅,好短時間短片就已經獲得過萬個Like,亦終於令好多人知道佢叫咩名。

靠自己努力,佢亦終於搏到無綫俾多咗機會佢。啱啱喺《降魔的》做完戀襪癖、瘋狂聞馬明對臭襪嘅的士乘客,轉個頭就喺《降魔的番外篇 - 首部曲》飾演懶叻科學家,都總算終於唔使再做茄喱啡。不過今次難得擔正,佢就竟然肥咗成個碼,連試造型嘅時候監製都忍唔住講咗4次黃建東真係好肥。劇照中佢同楊潮凱一拍埋就顯得更加身形龐大。

佢就話原來係因為壓力爆煲,搞到佢經常食嘢。因為自《PPAP》之後,佢好想突破自己,希望拍一條可以超越《PPAP》嘅片。佢亦知道好難,但係可能俾自己太大壓力,搞到好似患咗暴食症,要靠借食去減壓,好多時收工返屋企,其實唔肚餓但係都會去開雪櫃,好想放嘢入口。佢覺得身體深處好空虛,想要填滿自己嗰個感覺,但係填極都唔滿,佢覺得最恐怖係控制唔到自己。

雖然Derek有試過打泰拳,不過好似都唔成功,所以佢決定嚟緊會去揾精神科醫生朋友嘅診所同佢傾下,希望傾完之後佢會舒服啲啦!