「地道」週末影院:《歡樂時光》

呢2年,鼓吹女性勇敢舉報被性侵的#metoo運動席捲全球,影壇、體壇等等都有苦主站出來,勇氣可嘉。但係另一方面,好些案件中,男女之間嘅一夜風流,好難界定女性是否有共識同意發生關係,於是有人建議事前要簽「同意書」……

呢啲爭議,原來90年代嘅港產片已經討論過。

呢套就係1995年UFO出品嘅電影《歡樂時光》。故事講述地產經紀David(陳小春 飾)失戀,搵埋2個由細玩到大嘅死黨;4線藝員星仔(許志安 飾)同醫生張百常(張智霖 飾)一齊happy hour散心。3人於夜店內認識咗艷女Angel,4人之後去到David代理嘅大屋。點知3男卻因Angel意外失足墮樓,而成為千夫所指嘅嫌疑犯。

Angel原來係有夫之婦、家人眼中嘅好新抱,仲係教會教友眼中嘅「天使」。為咗掩飾而自稱被3男強姦,後因意外再次撞傷頭部而昏迷。90年代「睇真D」之類嘅資訊娛樂節目(Info-tainment Programme)盛行,傳媒因為星仔略有名氣同案件情夠爆,於是大肆報導,訪問Angel親友以建立賢妻、好女人形象,仲將三人稱為「新三狼」。未審訊,「新三狼」已經因事件分別身敗名裂。

《歡》唔止預先講出傳媒(而家連埋網友)未審先判嘅流弊,另一個好睇之處係三個本來共同進退又稱兄道弟嘅男人,點樣搵機會甩身。

因為Angel昏迷,案惰毫無進展,脫罪機會渺茫,團結嘅3人開始動搖。百常最先改口供,聲稱自己酒量淺一早爛醉,同Angel無接觸。星仔發揮演技,於庭上宣稱自己係同性戀者並有固定男友(陳豪 飾),2人欲將罪名推到David身上。

比起其他UFO出品,《歡》唔算收得,但絕對係滄海遺珠。劉青雲飾演的辯護律師出場之後,成套戲開始「入局」,尤其是三個男人喺庭上互相推諉嘅過程。朋友?兄弟?一諗到要坐監,個個都想對方死。

喺呢個「未審先判」更嚴重嘅年代,成個司法制度點先可以保持可信性?呢套戲如果要拍一個2019年版本,取材可能好容易,因為呢類「羅生門」真係俯拾皆是……