「地道」星期五影院:《豪情》

古天樂久別樂壇,今年同謝安琪合唱《(一個男人)一個女人和浴室》即刻入左「叱咤樂壇我最喜愛的男歌手」5強,可見大家幾咁迷戀古天樂嘅歌聲。5強仲有陳奕迅、張敬軒、周國賢同陳柏宇,古生會唔會有機會上台攞獎要等1月1日揭曉。

向來反應快嘅創作平台Cap TV,就用古天樂同陳奕迅2位候選人主演嘅電影《豪情》,整咗條「『我最喜愛男歌手』嘅絕密內訌片段」,搞到我想睇返《豪情》呢套戲,尤其是古陳二人合唱一幕……

2003年古天樂首次做監製,同陳奕迅齊齊做主角,拍左呢套都幾爆嘅三級片。電影當年嘅賣點係裸女,大量祼女!因為《豪情》係講2個後生仔Andy(古天樂 飾)同阿忠(陳奕迅 飾)本來係文字人,滿腔熱血,一個係電視台編劇,一個做漫畫編輯,不過幾熱血都避唔開時間巨輪︰雜誌銷量跌,摺書潮湧現,電視台又越買越多外購劇。結果2人為生計,轉以筆名「肥龍」同「骨精強」撰寫成人專欄,專題採訪色情場所仲做埋指南,結果大受歡迎!

要寫文寫得好,資料搜集同親身採訪一樣都不能少。就係咁,Andy同阿忠因此親訪各大性工作者以及佢地嘅工作場所,有時仲會寫用家報告,因為咁我地見識到有啲懶嘅崔波波(谷祖琳 飾)、口技出眾嘅趙郎郎(何超儀 飾)同好有姿色嘅Kiki (周麗淇 飾),仲未計2人嘅女朋友:Pamela (應釆兒 飾)同當時長髮飄飄嘅Fanny (何韻詩 飾),可謂豔福不淺!

《豪情》主線描述Andy同阿忠兩兄弟為理想創業,事業成功而反目最後又冰釋前嫌嘅故事。不過,一眾女演員實在太搶鏡,兄弟情再動人都唔夠市井小情小趣嘅咸咸濕濕令人印象深刻。至少15年後嘅今日,我依然記得Andy同阿忠拖住手合唱《獅子山下》咸濕版「婷婷俾你驚喜~」。