「地道」星期五影院:低下階層悲歌《籠民》

政府近日宣佈將申請長者綜援嘅年齡門檻由六十歲調高至六十五歲,議員就新例群情洶湧表示反對。特首林鄭月娥冷冷秒回「唔會撤回」措施,因為香港人均壽命長,所以要推後個申請門檻,變相叫班老人家捱多幾年,最妙呢個議案亦係由同一班議員通過!

我相信仍有唔少議員真心為市民謀福祉,不過太多時候做show多過做實事,缺席會議無左關鍵一票時有聽聞,議案過左先道歉,真係道幾多次歉都無用。

呢啲新聞睇得太多,諗返起1992年張之亮導演嘅寫實作品《籠民》。故事講述一班中老年籠屋居民,面對業主收樓被逼遷嘅問題。電影榮獲第12屆獲香港金像獎最佳影片、編劇、導演及男配角(廖啟智)4項大獎。

籠屋管理員肥婆(喬宏 飾)同智力遲緩嘅兒子太子森(廖啟智 飾)共同管理幾十戶籠屋居民,提供茶水及基本維修。住客分別有已屆高齡、經營日用品買賣嘅711(李名煬 飾),幫711打工嘅老人妹頭(黃志強 飾)、與馬騮同住錢掛口邊嘅唐三(泰迪羅賓 飾)、勇武嘅陸同(谷峰 飾)同剛剛出獄、唯一嘅年輕人毛仔(黃家駒 飾)。

肥婆一日收到業主寄嚟嘅搬遷信,限期8個星期要所有人搬走,因為棟樓要清拆,各住客初頭不以為然,仲搵埋徐議員(陳國新 飾)同區議員(周聰 飾)幫手談判爭取合理賠償。2位官員搵嚟大批記者採訪,聲討無良業主云云,不過做哂訪問聽完訴求後,並無實際方法幫到幫籠民。徐議員表面幫市民,實際同發展商勾結,仲收買毛仔幫手呃班籠民簽遷出同意書。

所謂嘅「巨額」賠償就係每人$1758.4,就算條件唔理想亦無議價能力,最後呢班低下階層只能硬生生被強行拖出籠屋。

其中一幕徐議員同發展商高層草地打golf,非常涼簿地討論如何小恩小惠打發班籠民,盡快收地再發展先有錢賺,對拆遷後籠民生活何去何從完全唔關心。

26年過去,香港土地問題越發嚴重,年輕在職嘅一群,只能夠住喺美化嘅籠屋單位-劏房之內,而年老弱勢嘅一群更無力,政府同各大商家又真心關愛咗幾多?