「地道」影院特別場︰梅姐生日睇《鍾無艷》

被稱為「香港女兒」嘅梅艷芳(梅姐)有情有義,對社會有擔帶,慈善活動同民主活動都一樣出錢出力,喺今時今日只為利益無風骨仲會出賣自己人嘅香港,顯得更加難能可貴。香港再無第2個梅艷芳,無論喺舞台定大銀幕同樣發光發熱大放異彩,今日係佢55歲冥壽,我地只能從佢一生眾多精彩演出中懷念佢。

梅姐唱得,演戲亦得,代表作會係《胭脂扣》嘅如花、《川島芳子》嘅傳奇人物、《審死官》嘅宋夫人?定係《男人四十》歸於平淡嘅陳文靖?其實梅姐拍咩都入型入格,就算做喜劇反串都咁好睇!

講起梅姐,通常都諗起霸氣、氣場、皇者呢啲字眼,不過可愛都係梅姐其中一個特質,可以由杜琪峯及韋家輝執導作品《鍾無艷》入面搵到!

「有事鍾無艷,無事夏迎春」嘅故仔大家都耳熟能詳,2001年《鍾》係賀歲電影,所以電影故事多左神仙同小小夢幻嘅改動,鍾無艷(鄭秀文 飾)因為拒絕狐狸精(張柏芝 飾)求愛而被落下愛情咒,真愛會令佢變醜,偏偏鍾無艷同齊宣王(梅艷芳 飾)情定三生,對齊宣王一見鍾情,不過中咒嘅佢喺真愛面前只能成為醜女!

狐狸精為左離間鍾無艷同齊宣王感情而化身成夏迎春,因為貌美而得到寵愛,雖然國事戰事加上狐狸精搞事,齊王同無艷經歷過結婚離婚(無睇錯,戲入面佢地真係講「離婚」),同國破家亡咁滯先明白最愛是誰,最後有情人終成眷屬!

齊宣王好色又懦弱,本來係個討厭又唔值得愛嘅男人,但梅姐嘅反串演出,好笑之餘仲有幾分可愛,誇張嘅表情同動作將無能昏君演得十分到位,最後同無艷真情告白時又非常真撃動人!

梅姐嘅吸引力仲有其中性特質,其中一幕講敵軍殺到,齊宣王為左逃命而扮女裝自稱「北宮娘娘」,竟然令叛軍吳起一見鍾情!男裝女裝都令人神魂顛倒,除左梅姐同哥哥張國榮都好難有第3個人可以咁有魅力!仲未計佢1人分飾2角做失靈神仙,施法要睇天書都未必搞得掂嘅齊宣王曾曾曾曾曾曾祖父齊桓公,論盡蝦碌一樣演得出色!

《鍾無艷》上映時票房理想,僅次於同年周星馳嘅《少林足球》同《瘦身男女》(都係杜sir同鄭秀文!),成功原因3位女主角功不可沒,不過無左梅姐飾演呢個無用又成日見異思遷但又奇怪地嬲佢唔落嘅齊宣王,鍾無艷能力再高都無深情嘅理由,狐狸精都無出手嘅需要,因為唔值得爭囉!今日係梅姐冥壽,除左懷緬香港曾經有獨一無二、無可取代嘅天后,仲係個懷緬香港曾經美好嘅日子。