【地道星期五影院】80年代科幻喜劇《星際鈍胎》鍾楚紅先係賣點!

港產片近年拍得最多係警匪片,偶爾有啲小品,題材都偏寫實嘅多。其實香港早年拍落唔少天馬行空嘅戲,科幻題材都唔少,好似改編倪匡「衛斯理」系列嘅《衛斯理傳奇》、《原振俠與衛斯理》等。不過依家講起科幻片可能聯想起外太空題材,所以今日同大家重溫一套1983年出品《星際鈍胎》。

《星》由章國明執導、文雋編劇,集外星人、喜劇、歌舞、養眼場面及特效於一身,故事講述李天珍(鍾楚紅 飾)人如其名好天真,一心想嫁有錢仔,喺荒山野嶺談情期間被外星人捉上飛船,事後無人信佢同外星人有第三類接觸,仲因此同二世祖男友甩拖,傷心欲絕嘅天珍走去瞓火車軌尋死。

就喺火車軌上佢識到同樣嚟尋死嘅私家偵探伊電(伊雷 飾),伊因為追債太無情,導致債仔一家幾口自殺身亡,深感內疚。遇上李天珍後,決定幫天珍查出真相,還佢清白,為人為己做返見好事。最後2個人仲有情人終成眷屬添!

《星》入面嘅外星人唔多似高智慧生物,雖然有飛船,仲會發出紅外線燒傷無辜農民,架船仲好似有唔少機關,不過似乎唔多識分男同女!佢地因星球污染嚴重,嚟地球搵適合生仔嘅女性,結果鍾楚紅同扮女裝嘅伊雷都成為獵物,被認為適合生育而被捉咗上飛船!

荷里活拍咗好多超勁CG嘅外星人片,依家睇《星》科幻不足,不過娛樂性仲好夠!戲內搞好多爛gag,好似飛船上伊雷扮《星戰》同黑武士對打╴中間又夾2段歌舞,鍾楚紅咪嘴唱《白金升降機》似足拍MV,換足幾個造型。

紅姑行行下又要扮瑪麗蓮夢露,被風吹起條裙露春光,仲因為太養眼同太索,搞到多車連環相撞!時代進步,今時今日咁拍會被指物化女性,鬧到飛起;再者,依家都好難搵到如鍾楚紅咁正嘅女星,做無腦花瓶做得咁自然咁得人鍾意。

又簡單啲講,依家邊個行出嚟吹下裙底,會正到搞出交通意外?大家有咩未見過先?