【地道星期五影院】《仙樂飄飄》初出道陳慧琳仙氣大爆發

Happy Friday唔係好happy時可以點做?可以潮玩BB filter 自拍,又或者睇返套清新可愛小品輕鬆下啦。今日同大家回到1995年,一個無社交媒體都仲可以造星嘅年代,由張之亮執導嘅《仙樂飄飄》。

故事喺校園發生,無大起大落浮誇情節,寫實得嚟又好清新。故事講述演藝學院畢業嘅Wing李靖雲(陳慧琳 飾)一心想考入舞團,於舞蹈團甄選期間,兼職當小學音樂教師,負責訓練一班各有個性嘅小學生參加校際音樂比賽,期間得到體育老師林Sir(郭富城 飾)幫助,Wing先能夠舞團、學校兩兼顧。而林Sir亦對Wing產生好感,一對年青教師,加上一群可愛的小學生,於比賽中學習成長。

《仙》係陳慧琳處女電影,當時為咗捧新人係會度身訂造開戲佢做,套戲仲用埋佢出道歌曲《一切很美 只因有你》做主題曲。因為故事圍繞住一班小學生合唱團,戲內都唔少歌曲,所以順理成章出埋電影原聲大碟,仲要拎埋唱片銷量榜冠軍!90年代仲會出力捧新人,難得當時陳慧琳零演藝經驗,但演起阿Wing一角相當自然討喜。

一套咁「正氣」嘅戲,都要有條愛情線觀眾先收貨。搵郭富城同陳慧琳談情,呢段關係就寫得相當含蓄,主要都係郭富城飾演嘅林sir喺Wing身邊默默付出,終於抱得美人歸。林Sir雖然唔夠班細路搶鏡,不過角色好真實,極受學生歡迎,但上頭主任唔多buy佢,經常借機點名批評,好似而家啲老師嘅處境;工作唔順意,情場又無膽,見到Wing高大有型嘅朋友Michael,即時自卑唔自在,都係幾多人嘅縮影。

而一班合唱團小朋友嘅生活日常,瑣碎得嚟又充滿人生道理,好似佢地討論參加比賽嘅意義只不過係多個獎放喺學校玻璃櫃做展品,所以無心練習,上場又輕敵,結果首次比賽包尾收場,成為全校笑柄,喺飯堂遭排擠,成團人無位食飯要屈喺門口食!被人恰時又恰人,取笑新加入、有對大耳朵嘅JoJo,唔同佢做朋友。

班小朋友都幾mean,不過佢地嘅好處係改正能力極強,領悟力高,明白心地好比外貌重要,好快就同JoJo打成一片。珍惜失而復得嘅參賽機會,用心練習準備,難得看透世情,比賽不為輸贏只為進步,反而成年人(阿Wing)不想輸,想用班學生嚟証明自己能力。

《仙樂飄飄》嘅學生們有頑劣亦有成熟嘅時候,但大部份時間非常純真,故事又唔煽情。其中最戲劇性嘅情節,應該係郭富城扮唔識跳舞,要由陳慧琳飾演嘅舞林高手指導,現實場戲係由真正舞林高手城城親自指導!有時都幾懷念舊時,一個仲會用walkman同錄音帶嘅年代,無咁方便但多返好多人情味!

一邊睇戲,一邊覺得,嘩,究竟我睇緊郭富城定徐天祐?