【地道星期五影院】《神經俠侶》—變的是灣仔、人心,還是警察?

《神經俠侶》算得上係2005年嘅滄海遺珠,電影由阮世生執導,陳奕迅、容祖兒、吳鎮宇主演,電影仲有唔少好戲之人好似惠英紅、廖啟智、李燦森、江美儀、袁富華客串,又有方中信、丁平、原島大地出過場,個演員陣容如果搬到今日嘅港產片,應該會係賀歲片先有嘅排陣!

不過,當年《神》上映時唔算係大片,只係小品類型,票房甚至有啲強差人意。雖然唔叫座但評價不俗,獲得第25屆香港電影金像獎、第11屆香港電影金紫荊獎最佳編劇(阮世生、方晴、羅耀輝),被香港電影評論學會選為「推薦電影」。

電影分成陳奕迅、容祖兒(警察)同吳鎮宇(市民)兩條主線,陳俊傑(陳奕迅 飾)當差7年,期間受過唔少氣,好似抄牌被人問侯、關心又被人嫌多事,當差當到麻木哂,仲要帶熱血新仔廖得男(容祖兒 飾)於灣仔巡更。

王志成(吳鎮宇 飾)住灣仔,本來係建築師,因為金融風暴欠下巨債,搞到妻離子散更患上精神病,與經營報攤嘅家姐同住(惠英紅 飾),與樓上按摩女菲菲互有好感。

區內出現姦殺案,陳、廖都認識嘅少女Diet慘遭毒手,陳俊傑因自責未能保護佢,積極揖拿兇手。一日,菲菲被強姦犯盯上,幸得志成發現,拼死保護而逃過一刧,最後因俊傑窮追不捨,終於將強姦犯逮捕歸案。


《神》以灣仔為故事背景,寫出好多小市民嘅故事,開內衣舖嘅江美儀久唔久遭神智不清嘅志成搗亂,雖然覺煩厭但因為體諒志成而無報警;林雪飾演嘅中年男人因為缺錢偷奶粉被捉,之後因為無助而輕生; 袁富華飾演嘅小市民,為生活總喺暗處偷渠蓋、拆窗花,平常近乎隱身,但重要時刻會發聲、指出強姦犯去向。

俊傑嘅hea住打工嘅心態,可能係唔少港人嘅寫照,不過重要時刻,佢一樣出盡力理行職責;志成同菲菲屬社會邊緣人,因為愛情互相保護,日子再難都一齊過「有粥食粥、有飯食飯」嘅生活,讓人動容。

可能《神》無戲劇性情節同花巧電腦特技,只有寫實人情味而成為當年票房上嘅遺珠。依家睇返《神經俠侶》其實幾唏噓,因為灣仔已經唔同哂樣,警員制服亦由綠變藍,最大轉變梗係警察喺市民心中地位同印象亦大為不同。