【地道星期五影院】《神勇雙妹嘜》睇兩大影后藐咀藐舌

8、90年代港產片有勁多無厘頭笑片,啲爛gag睇極唔厭,尤其係周星馳電影,戲入面抵死啜核嘅對白嚟到今日依然好笑!有好多地道對白,唔係香港人都幾難明,不過完全無阻佢地賣埠,喺亞洲地區一樣咁受歡迎!

今日同大家回顧返套無厘頭、純搞gag同無道德包袱嘅港產片《神勇雙妹嘜》。套戲由王晶執導,佢亦有參與演出,做一個咸濕猥瑣嘅麻甩佬。同片仲有……陳百祥飾演縮骨、得把口無咩用嘅「大佬」瀟洒,2位女主角梁醒波(鄭裕玲 飾)同鐵小小(張曼玉 飾)都唔係咩好人,全程發姣,見到靚仔不顧一切懶理對方係咪殺人狂都要黐埋去。

波同小小係表姐妹關係,由細鬥到大,見親面到係出口術互串。長輩過世留低層樓,寫明要佢2個一齊住夠一年先可以分錢,唔係就捐俾慈善機構都唔益佢地,因此識到租客Ben。表面高大威猛嘅佢係走私集團成員,因為獨吞國寶惹上殺身之禍。

照理見到屋企死咗人會報警,不過波同小小怕上身無咁做,反而叫觀音兵瀟洒同手下烏蠅諗辦法搞掂條屍,仲因為Ben而被其他黑幫追撃。已經俾黑幫同槍指住個頭,2位女士都依然唔理自身安全,瞓身姣溝自稱係Ben細佬嘅Sam (林俊賢 飾)!

因為戲中角色都以自己利益行先,為咗出位、脫身無所不用其極,所以製造咗唔少笑料。好似醒波笑人無身材、踩低人地抬高自己,仲有少少cheap;小小明明開口埋口都係粗口,但為咗扮清純引Sam注意,竟然落Disco叫鮮奶飲。潚洒扮大佬但其實廢柴一件,最好心地其實係手下烏蠅,不問回報任勞任怨,好在最後因為中槍唔死得,受人敬仰,做埋大佬添!

成套爛充滿住極mean爛gag「飲奶好呀,以形補形」、「食蕉啦,蕉平呀」、「你無殺人傾向?咪聽佢亂噏,我未夠25歲!」張曼玉同Do姐用力藐咀藐舌嘅樣,真係幾好睇!其他無厘頭劇情仲有唱生日歌引隻狼狗吹熄蠟燭脫困,同用Sam其實係女扮男裝嘅卧底探員嚟埋尾!

《神探雙妹嘜》內嘅人物智商同心智都離奇地超現實,睇返當年歌舞昇平,連8964都未發生,做人只求娛樂,太平盛世自然可以攞道德嚟開玩笑。依家單純用爛gag做賣點,無巧思無心思嘅作品,唔止香港,其他地區觀眾都唔會賣賬。