【地道星期五影院】因為《忘記和記》睇返《愛你愛到殺死你》

最近麥浚龍同黎明合作新歌《忘記和記》,即時勾起90年代電訊公司廣告大戰,其中最經典一定係黎明同和記一系列廣告。當時出新廣告次次都有金句,仲會成為大家嘅口頭禪,因為實在太hit,啲金句仲會用埋落電影度添!

好似1997年由黎明同鄭秀文主演嘅愛情喜劇《愛你愛到殺死你》,飾演圍邨村長嘅黎樹根(黎明 飾)一開波就幫七嬸捉返隻豬之後,仲講咗句當時大熱嘅「要贏人先要贏自己」!

《愛》講述歌手朱金梅(鄭秀文 飾)收到匿名恐嚇信,經理人阿旦(黃偉文 飾)報警求助,警方派出黎樹根假扮成朱金梅保姆,暗中保護及調查。黎樹根在經過數日的偵訊調查,終於查出這所有的恐嚇事件,皆是周刊記者因為對朱不滿懷恨在心,而故意製造的惡作劇!

黎與朱兩人在經歷幾番折騰之後已互萌愛意,發展出一段溫馨浪漫的戀情!大家以為一切終於平息的時候,怎料真正瘋狂的變態殺手另有其人,在暗中悄悄展開了「愛您愛到殺死您」的綁架行動,一切是如此的令人無法預料、措手不及!

在演唱會上,變態歌迷(黎耀祥 飾)如期出現,黎樹根成功逮捕,化解危機。

面對近日時勢,有時真係幾懷念90年代︰當年有四大天王,娛樂圈仲有新人,電影主題曲、插曲黎明嘅《DNA出錯》、鄭秀文《我們的主題曲》又會紅到街知巷聞;拍戲又可以無厘頭同亂講嘢,好似《愛》將同性戀定型戴單邊耳環嘅乸型,呢種角色設定今時今日可能得某大台拍劇仲會出現,其他媒介仲咁拍應該被人聲討同杯葛!

可惜有啲嘢點都返唔到轉頭。依家談情都好難,不問世事只係沉醉喺自己世界,至少都會了解下對方咩色同立場,係咪?