【地道星期五影院】唔多喜慶嘅賀歲片《霍元甲》

傳統上賀歲片以喜慶、柴娃娃齊人嘅喜劇為主。話哂新年流流最緊要好意頭,所以賀歲片好少死人或者好黑暗,不過凡事都有例外,2006年《霍元甲》算係少數唔喜慶嘅賀歲片。當年打正旗號宣傳《霍》為李連杰最後一套武術片,又死人又最後,認真大吉利是,不過票房理想,收咗3000幾萬,為華語片之冠!可能見唔係喜劇都收得,所以2007年時上咗套仲大吉利是嘅《門徒》賀歲!

fearless

《霍元甲》由于仁泰導演執導、袁和平做武指,加上李連杰硬淨嘅功夫根底,演譯出一代武術宗師精武門創辦人嘅一生。童年霍元甲父親以佢體弱多病為理由,唔俾佢習武,加上輸俾「趙家拳」傳人而深深不忿,發誓唔會以後輸俾任何人後,背住父親偷偷苦習霍家拳。

三十年後,武藝有成嘅佢成為天津第一,卻因為成名變得驕傲自大,放縱弟子以致家道中落,仲因此間接害死自己母親及養女。受到喪親之痛嘅佢投河自盡,被盲女月慈(孫儷 飾)救起,化名阿牛於鄉間過與世無爭嘅生活,重新思考武術嘅意義。

重返現實嘅佢,適逢八國聯軍入侵,霍元甲決定以武術為國爭光,於上海擋台戰中對戰四大外國高手,証明中國人唔係東亞病夫,最後因中毒於與日本對手三田對戰期間,病發身亡。

武術功夫片總係離唔開証明中國人唔係「東亞病夫」,《霍元甲》都唔例外。當年中國市場仲未大到套套億億聲,《霍》喺大陸票房都係收6500萬左右,只係多香港一倍左右,所以無單以內地觀眾為目標拍片,大中國主義仲未被放到超級大,仍係尚可接受嘅程度。而且戲中嘅霍元甲亦唔係完美,有行差踏差過,部份虛構情節仲引起霍家後人不滿而提出訴訟,要求片方公開道歉!

撇開故事真實性,《霍元甲》以武打片嚟講絕對娛樂性十足,李連杰憑此獲得香港電影評論學會最佳男主角,孫儷則獲提名香港金像獎最佳新人提名!

以李連杰最後一部武打片為賣點加上搵嚟當年音樂小天王,仲未開始演戲做導演嘅周杰倫獻出首支電影主題曲《霍元甲》,話題性十足,就算唔係喜劇一樣吸引到觀眾入場,成為賀歲片冠軍。