【地道星期五影院】一念天堂 取之救贖 用之殺戮 —《報應》

今日見到唔少網友開香檳慶祝,大家覺得開心係因為自古以來,我地一向信奉善有善報,惡有惡報,由童話故事至民間傳說,都以此概念展開。不過現實又係唔係咁黑白分明?善惡到頭終有報呢?

2011年由羅永昌導演嘅《報應》可以睇出端倪。電影講述富商王浩潮(黃秋生飾演)的女兒被綁架,他懷疑是反叛女兒Daisy (Janice Man飾)自導自演的敲詐把戲,可是變卦驟起,王浩潮的一個錯誤決定,以為可以同綁匪平起平坐談判,結果引致嚴重後果。

痛失女兒的王老闆,委派前任保鏢及心腹姚啟初(任賢齊飾演)向一眾綁匪展開追查及復仇行動。但正當啟初將綁匪們逐一解決的同時,王浩潮以為復仇可以懲罰敵人,但到頭來,受報應的卻是他自己。

電影有2個版本結局。(留意︰以下有劇透)

香港版王浩潮及姚啟初放過盧巧音飾演嘅Amy後,王完成Daisy遺願,帶埋女兒骨灰到玻利維亞天空之鏡,而姚啟初則喺車度遠遠咁望住自己個仔。內地版本則黑白分明,殺人填命,王及姚自首並被判終身監禁。今時今日,香港觀眾可能會buy終身監禁結局,因為日日都感受到有權有財嘅人點樣濫權,民不聊生!

可惜,香港版更貼近現實,王浩潮為收地致富,完全無視東禾村村民無家可歸嘅苦況,絕對係無良商人,結果報應報喺佢身上嗎?又唔似係。反而佢下屬,曹查理飾演嘅公司高層俾村民打死咗。因為無良經商、因為太有錢而無咗個女係報應?無錯,綁匪睇中佢副身家先會綁咗佢個女,但撕票好大原因出於王浩潮對住個犯太惡,自以為事說話不留餘地而起,王做錯決定而結果由佢個女承擔(被活埋)。

至於報仇之事,攞咗綁匪幾條命,有令王受到報應嗎?又唔見得,微微嘅良心責備算唔算報應?反而係佢心腹受人錢財以及江湖義氣幫佢殺人受傷,受到嘅報應仲大喎!《報應》講嘅其實唔係因果循環,而係有錢有權可以行善可以幫人,亦可以做盡壞事而全身而退,個世界其實唔多公平,要惡人有惡報,與其靠個天,倒不如靠自己。