嚴選近兩年螢幕情侶 邊pair你最鍾意?

呢兩年無綫劇集造就咗多對令觀眾印象深刻嘅螢幕情侶,今日就嚴選咗幾pair同大家重溫一下,究竟你哋最鍾意邊一對呢? 

洪永城&黃翠如
雖然黃翠如與洪永城只係普遍朋友,而且各自有另一半,但觀眾始終覺得佢地係最匹配嘅一對。佢地合作新劇《我瞞結婚了》中飾演夫妻令人有好Sweet嘅感覺,而且仲有種淡淡的幸福感,可想而之佢地產生左幾大嘅化學作用!

王浩信&朱千雪
《EU超時任務》大受歡迎,好多觀眾都話覺得渠頭(王浩信飾)對阿風(朱千雪飾)好深情,最後渠頭仲要為左救返阿風,忍受阿風唔記得佢嘅痛苦,連平時最有要求嘅高登巴打都話睇到佢地最後重遇個幕,忍唔住眼濕濕,抵佢地攞到「最受歡迎劇集搭檔獎」。繼《EU超時任務》之後,朱千雪喺王浩信嘅新劇入面有份客串再續情緣,大家記得留意啦!

何廣沛&江嘉敏
早前播出嘅《親親我好媽》中,何廣沛及江嘉敏成為最佳CP,佢地令好多觀眾緬懷讀書時代的青澀戀事,將自己代入其中。觀眾仲喺網上留言「開拍續集啦」、「好掛住佢哋」、「乜套劇咁短?」,睇黎TVB都估唔到佢地反應咁好。

陳展鵬&胡定欣
《城寨英雄》中陳展鵬與胡定欣由老闆娘同夥計嘅關係,後來排除萬難發展成情侶,成為唯一一對唔駛死嘅情侶 。陳展鵬和胡定欣憑住呢套劇贏得視帝視后之外,仲以情侶檔不停搵真銀,有傳佢地戲假情真秘密撻著幾個月。佢哋仲會喺新劇《同盟》中再次飾演情侶,鍾意佢哋嘅觀眾都時記得收睇啦!

伍允龍&劉佩玥
《城寨英雄》中「貓仔」龍成虎同柯德莉嘅愛情故事可歌可泣,龍成虎死個場令唔少觀眾感動到喊。而現實中嘅伍允龍同劉佩玥由拍《城寨》開始緋聞未停過,好多觀眾都覺得伍允龍同劉佩玥好襯,無論外型、身高都係絕配!

袁偉豪&王君馨
《城寨英雄》中花曼同牙佬幾經辛苦先可以一齊,但其後花曼遭殺手組織嘅人殺死,死前都來不及跟牙佬道別,看到電視機前嘅觀眾好心痛啊。 除咗陳展鵬同埋胡定欣之外,袁偉豪和王君馨亦憑《城寨英雄》牙佬及花曼贏得《星和無綫電視大獎2016》嘅「我最愛TVB螢幕情侶獎」。