【善待員工系列】結婚送樓 范冰冰公司3年零人離職

而家要搵到一份工作你鍾意做仲要福利好,而做夠幾年之後唔想走嘅工係好難嘅事。如果要再搵到一個有錢但唔孤寒、又體恤員工嘅老闆就難上加難!

范冰冰(范爺)2007年成立工作室之後,2011年接受訪問就話3年嚟無一個人離職。一班員工咁願意留低原來係因為老闆非常闊綽,佢嘅員工每年花紅除咗有6至7位數字人民幣之外,佢仲另外會加碼贈送出國機票、桌上型電腦、筆記本電腦及手機等等。

最誇張嘅係當有員工話要結婚,佢一出手就包咗30圍酒席,再加送禮金飾品。另外一位跟咗佢10年嘅員工結婚仲成棟樓送埋俾佢,之後范爺仲霸氣話今後我哋工作室女仔嘅婚禮佢會全包。范爺做事真係不同凡響。

范冰冰除咗完全唔擺老細款之外,佢仲經常同一班員工打成一片。好似前排佢喺微博大晒員工聚餐嘅相片,除咗叫到成枱都係嘢食之外,原來佢當日明明要趕飛機,不過仍然抽空同員工食飯,可見佢哋感情真係好好。如果佢見到員工因為工作要瞓梳化或者瞓地板,佢都會心痛到流眼淚,唔講仲以為睇緊劇集。

而好老細最高境界就當然係唔領功啦!上年范冰冰憑電影《我不是潘金蓮》獲得第64屆聖塞巴斯蒂安國際電影節最佳女主角嘅時候,佢就高調表示要將所有功勞歸功於團隊,仲大讚佢哋唔係宇宙無敵工作室,而係喺佢心目中嘅最勇往直前的勇士。

如果你遇到一個咁靚、咁闊佬、咁完美嘅老細,你又捨唔捨得走呢?