【唔會一家圑聚】森美父母檢疫四次先畀出關

森美父母要Sure一定係全部檢測都係陰性先走得。

電台DJ森美的父母登上被確診有新冠肺炎的鑽石公主號郵輪後,乘坐包機返港再往駿洋邨檢疫中心接受14天隔離,而周五正是隔離期滿。昨日森美接受訪問時,表示暫未確實父母離開檢疫中心日期:「佢哋已經再驗多兩次,走之前會再驗多次,sure係陰性先走得,前前後後驗咗起碼四次,要全部合格先得,因為要等檢驗報告齊咗啦,再等有關方面通知先知。」不過就算父母真的可回家,他也不會親自接送父母:「爸爸媽媽都話唔好咁高調,所以由妹妹接佢哋,父母唔係嫌棄我,佢哋都叫我盡量少做訪問,我解釋係因為傳媒朋友都好關心佢哋。」

森美又話雖然父母可以「出關」,但暫時不會「一家圑聚」,原因是擔心自己「中招」連累老人家:「佢哋驗咗咁多次係最安全,反而我哋冇驗過就唔知喇,佢哋年紀大啲,驚我哋有事唔知,咁就危機大,所以唔會有家庭聚會或慶祝吓嗰啲。」問到父母離開檢疫中心在即,是否真的放下心頭大石?他表示:「每一次啲報告出咗話冇事都安心啲,經過今次之後,覺得以前對父母做得唔夠好,日後會再做得好啲。」