【唔係表面咁風光】鄧智偉被S小姐爆經常北上買高仿名牌 供樓供車都係假

鄧智偉

44歲音樂人鄧智偉同無綫上位小花高海寧,自5年前開始一直被指秘密拍拖,仲話佢哋巳經去到談婚論嫁嘅階段,不過早前就傳出因鄧智偉背女友偷食,佢哋已經正式分手。鄧智偉仲被爆出曾經去警署報案,聲稱被一名女子恐嚇。近日事件更出現羅生門情況,鄧智偉向傳媒表示佢同「S小姐」喺夜場認識,不過就冇拍過拖,「S小姐」滋擾佢同朋友,更曾經騷擾緋聞女友高海寧。但「S小姐」另一方面向傳媒表示自己係做Marketing,唔係做舞小姐,而且強調佢同鄧智偉拍咗拖3至4個月。另外,「S小姐」話冇高海寧電話,所以冇騷擾佢。對於被指揚言要一層豪宅先肯收手,「S小姐」就解釋係鄧智偉經理人打電話比佢,叫佢簽份和解協議書,又問佢想要咩,佢先發晦氣話要豪宅。

今日有報道指「S小姐」一早知道鄧智偉並唔係表面咁風光,佢仲私底下查過鄧智偉,發現鄧智偉住緊嗰層樓唔係佢名,亦冇物業喺手,就連屯門間屋都係佢阿爸阿媽,之前接受訪問講過要供樓供車全部都係假嘅。除咗物業之外,「S小姐」又爆鄧智偉成日拉個咁大個篋上北京,其實係去買「高仿名牌」,佢曾經問過鄧智偉點解要買假嘢,但鄧智偉竟然話八千幾蚊對名牌波鞋太貴,買翻版都係1,200蚊人民幣一對,不過佢都有真嘢,至少隻錶同部電話係真。後來「S小姐」覺得同鄧智偉價值觀好唔同,仲嘗試糾正佢及叫對方買正貨,但鄧智偉都係聽完就算。