【唔使key圖】馬國明自備樹葉扮「唔係啩」樹熊

馬國明嘅招牌天然呆樣就係人都識,由2013年《萬千星輝賀台慶》開始,就被網民發現佢嘅天然呆O嘴樣,同潮圖「唔_係啩」樹熊成個餅印一樣之後,佢就成為網民最喜愛嘅Key圖人物。

噚晚馬國明出席「YAHOO搜尋人氣大獎 2017 頒獎典禮」,憑著劇集《降魔的》獲得人氣電視男角色獎。佢上台攞獎嘅時候就話「網民好鍾意喺頒獎禮見到我食白果嘅樣,雖然今晚有獎,我都唔介意再做嗰個樣俾大家睇。同埋我今晚就唔使大家Key得咁辛苦啦。」

呢個時候馬明就喺衫袋攞咗一塊葉出嚟,之後就話「因為我早有準備。」即刻引來森美同全場大笑,之後佢亦好識做地含住塊葉俾各位影相!認真玩得!

網民睇到之後都大讚馬明得意,留言話「馬明真係好鬼正..呢啲咪觀眾緣..」、「恭喜馬明攞獎呀~」、「佢真係好cute」、「馬明堅好波!!」、「又令我諗起果張相」、「 好可愛呀!」等等

馬明咁受歡迎,唔知今年視帝會唔會輪到佢呢?如果佢真係攞獎,佢又會係咩表情呢?大家拭目以待喇!