唔似睇緊劇 《巨輪II》越睇越似沖繩旅遊特輯

無綫劇集《巨輪II》播出以嚟收視同口碑都麻麻,原本以為可以好似第一輯咁受歡迎,點知今輯負評如潮,上星期收視已跌到得返22.2點,劇中主角蕭正楠被指未有資格上男一位置丶陳凱琳演技差丶劉思希膠面等等。新一輯主要講述羅威信(蕭正楠飾)及姚文英(田蕊妮飾)努力經營「羅信記」,但係惹來地產商高天鷲(吳岱融飾)不滿兼連番打壓,更被人出賣,於是羅威信就去日本沖繩尋找寧靜空間同埋尋找原材料,期間認識兼戀上高伊娜Nana(陳凱琳飾)。噚晚第12集劇情就講到喺沖繩嘅阿信同Nana去咗久米島搵原材料,期間有人帶佢哋參觀久米島著名嘅食材。去到紫薯田嘅時候,阿信有意向種紫薯嘅婆婆入貨,點知婆婆就話佢老公過身前簽咗一份合約,但係紫薯售價低於市價,Nana懷疑有人冒簽合約。最後,佢決定幫婆婆討回公道,將合約撕掉。

喺劇集未出街之前,無綫已經四圍宣傳話劇集除咗喺香港拍攝之外,佢哋仲去咗沖繩同澳門拍外景,但係點解《巨輪II》越睇越唔似劇集,反而似沖繩旅遊特輯呢,有幾似?而家就搵咗幾個例子俾大家睇下:

1. 自駕遊無難度
蕭正楠同陳展鵬兩兄弟為咗搵鍾嘉欣飾演嘅Rachal去咗沖繩一轉,當時佢哋就教大家可以喺出發前上網租定車,同埋唔識日文都可以自駕遊,因為車入面嘅GPS係英文介面。

2. 遺失護照處理方法
蕭正楠同劉思希一去到沖繩,劉思希就唔見咗本護照,之後佢哋就喺當地酒店搵職員幫手。

3. 國際通嘅由來
喺搵食材嘅時候,陳凱琳就帶蕭正楠同劉思希去遊客必到嘅國際通行街,介紹國際通嘅由來同埋沖繩著名手信。

4. 沖繩有好多美食
海鹽、苦瓜、紫心蕃薯、Agu豬、泡盛酒、海葡萄等等沖繩特產,經過呢幾集《巨輪II》瘋狂介紹之後,小編已經好清楚下次去沖繩係可以買呢啲特產試一試~

5. 介紹久米島
噚晚嗰集,陳凱琳就同蕭正楠坐汽車渡海輪去久米島搵原材料,期間仲影咗好多風景好靚同食物嘅鏡頭。

唔知大家覺得《巨輪II》係劇集定係似旅遊特輯呢?