《唐頓莊園》受歡迎到拍電影版 英式暗鬥「唐」心風暴

英國劇集《唐頓莊園》自2011年出街後好評不斷,劇集唔止英國受歡迎,連美國觀眾都好受落,播映以來得到多個獎項,分別獲得3個金球獎、15個艾美獎,認真威水。劇集大熱仲帶擘埋劇中一眾演員,其中星運最好應該要數飾演Lady Rose MacClare嘅Lily James!

2015年劇集大結局時,大把fans唔捨得,等足幾年終於等到電影版俾大家止止渴。電影版沿用同一班底,設定於1910年英國國王喬治五世時,唐頓莊園Crawley一家與僕人因為英國國王和王后大駕到訪唐頓大宅,Crawley家族爆發最激烈的「唐」心風暴。

故事有家族鬥爭、男女關係、貴族階級沒落、工人冒起等議題,雖然講得最多都係明爭暗鬥,Crawley一家爭產爭地位,僕人同皇室家僕爭地盤同主場話事權,當中包含唔少英式笑裡藏刀嘅尖酸刻簿及唇槍舌劍。不過《唐》受歡迎,除咗因為充滿juicy婆媽元素,仲因為「唐」心風暴得嚟觸及唔少社會議題,電影版加入同性戀議題,同志當時未被接受而受盡歧視,多線發展唔俗套得嚟又有反思空間。

因為劇集大受歡迎,用嚟拍攝嘅場地Highclere Castle都成為旅遊景點。不過呢個建於17世紀、有300間房嘅古堡,平時係唔會對外開放嘅,但因為電影宣傳同做善事,古堡主人Lady Carnarvon同airbnb合作,推出期間限定住宿計劃,俾劇迷一嘗《唐頓莊園》貴族生活。成功預訂嘅旅客將享有貼身管家服務、有份出席酒會同晚宴,入住費用仲相當相宜,不過入住條件之一必需要係《唐》忠粉,以及要著晚禮服出席晚宴!

Lady Carnarvon講到明古堡無wifi提供,所以未必可以邊食邊打卡,不過可以做一日lord或lady,上少陣網都可以接受嘅!電影《唐頓莊園》將於10月17日香港上映。