唐貝詩:拍喪禮笑唔停我有啲變態

東方日報
唐貝詩在教堂拍喪禮戲,要培養情緒。

藝人唐貝詩(Lydia)早前為拉闊劇團拍攝微電影《這些年我們都遺忘了》,其中一幕是眾人參加喪禮,場景應該是很哀傷及肅穆,Lydia表示實際上埋位前大家都嘻嘻哈哈笑不停:「我哋一班演員都係劇團嘅學生,所以大家好熟,拍喪禮嗰幕,我哋全部人都着黑色衫,有人就話我哋似係拉闊社團,啲同學真係太幽默,所以一路拍一路笑。之後我哋成班人去慶功,劇中死咗嗰個女同學冇嚟,所以大家將道具遺照放咗喺枱面一齊食飯,其他枱嘅人見到都係咁笑。」

雖然拍喪禮場面,Lydia卻完全不怕:「因為喺教堂拍唔係喺殯儀館,入到去覺得個教堂好靚,成件事好唯美。其實咁耐我都唔驚拍鬼片,反而好鍾意,可能我有啲變態,我鍾意拍驚慄、有人死同唔開心嘅戲。」

轉個頭,唐貝詩與成班演員嘻嘻哈哈!