唐詩詠深V炸紅氈 馮盈盈嫁衣療情傷?

東方日報
失落視后的唐詩詠,以Deep V裙贏番仗。

眾女星昨晚無懼寒冷天氣,性感現身台慶頒獎禮,不少更打扮得似足新娘子!當中以大V Deep到落肚臍的唐詩詠最搶Fo,而馮盈盈、江嘉敏、陳煒及何雁詩等亦紛紛鬥「胸」器,無論失戀、失婚、熱戀或準人妻,都以打扮表明對婚姻有憧憬!

每年的《萬千星輝頒獎典禮》紅地氈都十足戰場,今年大部分女星以白色Tone上陣,剪裁更儼如婚紗,當中以唐詩詠最進取!憑《白色強人》問鼎視后的她,大抵有勁敵惠英紅、楊千嬅當前,心中早已打定輸數,故把心思放在打扮上,以超Deep V裙力谷微波!剛宣布婚訊的何雁詩,索性穿上Pre-wedding晚裝,但胸前有點離罩,她坦言:「係有啲鬆,因為瘦咗,條裙係之前Pre-wedding揀咗冇着。(老公過目?)未婚夫啫!佢有睇過,但冇乜Comment。」

發福江嘉敏谷盡

而角逐「最受歡迎電視女角色」的江嘉敏罕有谷3吋「事業線」,自爆因拍劇增磅8kg,後來花半年才減掉5kg,問男友可有過目?她說:「男友同經理人一齊揀,其實仲有一條更性感,上下都露,因為下身高衩,但經理人話我粗魯,所以揀咗條仙氣啲!」甩拖的馮盈盈玩透Bra,問是否分手後可以性感啲?她說:「唔係,從來冇呢樣嘢。(怕唔怕又有網店抄?)唔擔心,靚先有人跟風,希望聽日就見到呢套衫添!」而陳煒以小布仔遮胸,高海寧與張曦雯則以黑白雙煞吊帶裙亮相,齊齊拋胸!

亦有女星玩另類,如李佳芯玩下身透視,胡定欣則紅噹噹似利是封,而傳撻着胡鴻鈞的蔡思貝包到冚,腰肢圓碌碌。

江嘉敏肥咗好肉地,可以騷吓Quali。
湯洛雯留前鬥後晒玉背。
朱晨麗以復古打扮晒香肩。
王君馨玩上下夾擊。