唐詩詠任陳展鵬摷 嗌大力啲

東方日報
陳展鵬為唐詩詠按摩頭部,對方幾Enjoy!

視帝陳展鵬與視后唐詩詠日前拍攝一場超搞笑按摩戲份,展鵬笑言自己訓練有素,一出撒手鐧就搞到詩詠不停冧叫,一時嗌舒服,一時又叫大力啲,雙方都好Hyper。

唐詩詠與陳展鵬拍攝無綫劇集《超能使者》,劇情講述詩詠是臨時演員阿頭,展鵬就去當臨時演員,詩詠頭暈坐低,展鵬見狀即為她按摩頭部,詩詠非常享受,冧到好似「叫床」一樣。拍攝時展鵬將詩詠個頭不停扭擰兼狂摷,又問:「夠唔夠力呀?舒唔舒服?使唔使大力啲?」詩詠說:「舒服,好呀!大力啲。」之後展鵬說:「乜你咁易滿足(口架)!」詩詠不斷咿咿呀呀,每拍完一個Shot,頭髮都亂到雀巢一樣,十分搞笑,今次她盡地一煲,盡顯醜態,拍了幾次以為收貨,殊不知監製突然說:「嚟一個『有美感』啲嘅。」她都要等一等、諗一諗甚樣演繹,不過貴為視后的她當然一Take搞掂。

「最緊要有個好對手」

事後二人接受訪問,詩詠笑說:「我諗住要誇張啲、喜劇感大啲,自己都豁咗出去,以最肉酸一面示人,但監製想有少少美感。」她坦言未試過拍此類喜劇,今次是一個挑戰:「呢啲搞笑OK嘅,唔係意淫,好考演技,其實之前《唐人街》都有少少,不過呢套盡啲,最緊要拍出嚟觀眾睇得開心。」說到展鵬令詩詠High爆之餘,自己都摷得好開心,他打趣說:「梗係!我成日訓練(口架)!(幫老婆呀?)按摩啫!」在旁的詩詠笑說:「下年又多一個(BB)!」展鵬說:「咁呢啲我嘅責任嚟嘅!詩詠好嘢!佢可以多條出路,我都冇掂到佢,佢反應都好好,好有潛質,我講拍戲咋!拍呢啲戲最緊要有個好對手!」

另外,同劇的劉穎鏇昨日為劇集開工,不乏打戲的她透露日前與陳國峰對打時,因手勢未純熟導致左手瘀傷,而另一場戲卻不慎弄傷林子善:「講我要拎住掃把打佢,初頭驚整到佢就打佢手臂,但效果唔夠真,後來嚟真打,點知個掃把反彈拍咗落佢後腦瘀咗,佢話當時暈一暈,真係唔好意思,呢件事教曉我寧願一下真打好啲!」

唐詩詠坦言今次豁出去咁演!
陳展鵬按摩訓練有素,唔怪得手臂都大隻啲啦!