【哪來的自信】寸咀導演谷新片 明踩Marvel作品︰想瞓覺會開嚟睇

香港剛剛就有位自認好叻嘅藝人出嚟表演厚顏無恥同低智慧,如果為咗博見報專登出嚟都叫情有可原,奇在呢位人兄無任何新作推出,走出嚟講咁多嘢唔知博咩!

荷里活方面都有導演宣傳新片期間口不擇言,希望佢係為曝光而唔係真心咁諗。話說導演 Roland Emmerich日前宣傳新作《決戰中途島》時明踩漫威(Marvel)電影,話搭飛機如果想瞓覺會開漫威電影嚟睇喎!

最早批評漫威電影嘅係大導演馬田史高西斯,及後另一殿堂級導演哥普拉亦加入行列,認為超級英雄電影唔算得上係真正嘅電影。2位大前輩攞過幾座奧斯卡,又拍過《的士司機》、《教父》呢啲讀電影必修經典,話哂係電影史上留有一席位,佢地對漫威電影嘅評價未必個個認同,但叫做有根有據有份量,不過Roland Emmerich作出如此評價就令人摸不著頭腦。

Roland Emmerich作品全部都係純感官刺激娛樂片,雖然有票房保証,不過故事真係不敢恭維。近幾年作品包括2016年炒返自己1996年舊作冷飯、IMDB電影網得5.2低評分嘅《天煞地球反擊戰:復甦紀元》、2013年同《白宮淪陷》極相似嘅《白宮末日》、以及2009年同樣影評麻麻、講述世界末日嘅災難片《2012》。

簡單講Roland Emmerich好鍾意玩電腦特效,無論係保護總統定挽救世界,全片必定會充滿爆炸、高樓大廈被毀同緊張逃生畫面,相信新作《決戰中途島》都唔例外。電影講述二次世界大戰時期,日軍於1941年12月偷襲珍珠港,六個月後日軍再將目光聚焦於太平洋上的中途島,借機將美軍於太平洋的殘餘艦隊一舉殲滅,以報美軍空襲東京之仇,亦乘勢打開夏威夷群島的大門,為下一步進攻部署。

就在1942年6月4日早上,美日雙方經過歷時48小時的激烈戰鬥後,美軍於中途島環礁附近擊敗日軍攻擊艦隊,,是次戰役被歷史學家稱之為 "人類海戰歷史上最令人震驚和決定性的打擊"。

據聞《決》用超過一億美金做電腦特技,相信電影將會有大量對戰場面,分分鐘睇到你頭暈,不過基於導演過往紀錄,有理由懷疑《決》會係又一套有畫面無故事嘅電影。2009年漫威電影宇宙尚未成形,《2012》嘅特效都仲叫有吸引力,但今時今日無論視覺效果同故事鋪陳,漫威都做到高手級,而Roland Emmerich上一套作品係負評如潮、票房一般嘅《天煞地球反擊戰:復甦紀元》,哪來嘅自信批評漫威電影悶到瞓覺?