哥基養咗7年 張致恒大肚妻窮盡堅持不棄養

養開動物先會明白作為主人不棄養嘅決心。

藝人張致恒(Steven)去年因捲入桃色風波以致形象插水,演藝工作亦大受影響,去年底更為養家到酒店做廚房散工,近日由於疫情關係,佢再轉行兼職做經紀。不過有網民就留意到Steven同老婆歐燕雯(雯雯)現時除咗手抱一個肚中一個,更有養3隻哥基犬,花費自然增加,即質疑Steven冇錢仲養狗!

今日雯雯為老公澄清指3隻狗係佢婚前養咗7年,並非婚後先養,更強調唔會棄養寵物:「其實3隻狗我已經養咗7年,亦唔係結婚之後先養,所以(冇錢點解仲要養狗呢啲說話),其實唔適合放喺我老公身上。我對於我嘅寵物我係好執着,只要我生完bb有能力,我一定可以照顧番佢哋,我好想講我係唔會放棄佢哋,由一開始你選擇得照顧佢哋,你就有責任照顧佢哋到老,而唔係自己有問題就第一時間去諗放棄佢哋,就係因為有太多自私嘅人 因為自己呢一刻發生嘅事 而去犧牲自己嘅寵物 世界先有咁多被遺棄嘅動物。其實我覺得有問題有難題 咪諗辦法解決囉,剩係識諗去放棄啲乜野 唔係一個解決辦法!要動物去為你犧牲 會唔會顯得人類太冇用!」

小動物係無辜嘅…