咪笑住!海南島國際電影節有視野有驚喜

大家仲記唔記得海南島國際電影節?上年有Johnny Depp、Nicholas Cage、法國影后Juliette Binoche、Isabelle Huppert、印度良心Aamir Khan、《誣網》丹麥男星Mads Mikkelsen出席𠴱個?

話咁快又嚟到第二屆海南島國際電影節,由國家電影局、中央電視台及海南省人民政府共同主辦嘅大型活動,因為由國家出錢,有理由相信影展選片題材會有所限制。不過不得不讚下真係落手落腳去搞影展嘅團隊,今年先舉辦第2屆,但係規模同風格拍得住國際影展,難得主題海報無咩內地官式浮跨味,幾雅致下!

影展分成幾個部份,包括業界市場交流,俾參加嘅電影公司買賣海外發行權,創作人如果有劇本有意念不過無資金,可以參加創投會,由評審選出可獲贊助或投資基金嘅電影項目,而觀眾最關心嘅應該係有咩參展影片!今年唔止內地電影,加入多個單元包含世界各地電影,其中較矚目包括由《變形金剛》男星Shia LaBeouf編劇嘅、獲得Sundance電影展評審團特別獎嘅Honey Boy、於康城影展獲得一種關注單元評審團特別獎,由Bruno Dumont封導嘅Joan of Arc。

影片選單銳意同其他國際影展睇齊,名單中不乏入圍柏林影展競賽部份Emin Alper執導嘅A Tale of Three Sisters;Geneviève Dulude-De Celles執導講述青少年成長困惑嘅A Colony;威尼斯影展Orizzonti單元開幕電影、Katrin Gebbe執導嘅德國電影Pelican Blood;亦有商業味濃啲,由英國型男Eddie Redmayne同Felicity Jones主演嘅《熱氣球飛行家》。

影展仲搵咗法國影后Isabelle Huppert做影展金椰獎國際評委會主席,另外仲搞咗個大師嘉年華,搵嚟我哋熟悉嘅關錦鵬導演、日本大師《東京奏嗚曲》、《身後戀事》導演黑澤清、兩奪奧斯卡最佳外語片、執導《伊朗式分居》、《伊朗式遷局》、《人盡皆知》伊朗大師Asghar Farhadi及《情約半生》美國影星Ethan Hawke同大家分享佢地嘅創作歷程,絕對有助一眾有志投身創作嘅年輕人到場取經!

睇得出海南島好有心做好影展,我都希望佢地可以成為第二個釜山影展,帶動旅遊之餘仲造福觀眾,睇到世界各地出品嘅好電影,不過影展做到國際級都要多方面配合,培養對各類型、題材電影嘅興趣,媒體對電影人有足夠嘅認識而唔係單純追點撃率。當然一個高質素嘅主持人亦相當重要,話說Ethan Hawke行紅地毯時耐心等上一組嘉賓離開,打算接受負責紅地毯主持人嘅訪問,點知原地企後,主持人直接叫佢行入場,寒喧都無句,因為急住訪問喺Ethan Hawke後面嘅楊冪!

國際影展紅地毯冷待嚟做大師班分享嘅國際影星Ethan Hawke,反而追住無作品參展嘅楊冪,呢位豬隊友簡直白白浪費咗影展選片團隊嘅用心!