「和你罷睇」電影名單 邊套要罷睇?

話咁快就過農曆年,近日有網民發起「和你罷睇」電影名單,仲列出罷睇指數及原因。就咁睇幾乎所有中文片都唔睇得,不過罷睇理由有待商確,仲搞到男神黃子華要出面澄清,佢套賀歲片《乜代宗師》之所以要到深圳拍攝完全係因為電影由佢自資,賣埋層樓拍戲都係為咗創作自由,絕無因為收下巨額片酬後,資金不足而要剝削幕後人員人工咁話!

我地又一齊嚟睇下究竟以下幾套賀歲片值唔值得罷睇:

《緊急救援》、《中國女排》

罷睇原因:獲內地資金投資,兩部電影改編自真人真事,有歌頌及唱好內地,粉飾太平之嫌。

《肥龍過江》、《家有囍事2020》

罷睇原因:獲內地資金投資,前者有藍絲代表王晶、警隊之友陳友主演,後者炒冷飯以及其中演員陳淑蘭都係屬警隊之友

《我的情敵女婿》

罷睇原因:理據少弱,出品公司英皇電影係維穩公司。不過導演葉念琛一向取材貼近香港,《我》屬可睇可唔睇之選

《乜代宗師》

罷睇原因:因為部份於深圳拍攝,有剝削員工之嫌 (因為黃子華親自出面澄清,所以《乜》已於罷睇名單中除名)

今時今日有立場,精明選擇消費當然重要,不過如何選擇同點解選擇就要認真分析。入場睇戲嘅首要原因應該係電影榻身有咩賣點,舉例《家有囍事2020》,黃百鳴年年都有賀歲片,對於其作品水平應該了然於心,後生一輩明顯唔係佢目標客群。

又以《肥龍過江》為例,特技化妝變肥仔然後查案蝦碌盡出,由海報到條橋都老土,TVB係其中一個出品人,劇情分分鐘都好TVB,其實唔發起罷睇活動,相信觀眾都已經作出選擇。

《緊急救援》極似內地支持主旋律電影,但係導演林超然公開場合明講咗佢攞到大資金拍大製作,所以會盡請香港人團隊做幕後。錢係紅色但香港業界人員有受惠,其實唔止《緊》,本地製作有限,所以唔少香港幕後人都北上參與內地電影、電視劇製作,如何喺理想同現實作出平衝值得深思。

對症下藥先係正事,早前發起罷睇《葉問4》結果無咩效果而且繼續票房理想。唔係文宣無效,而係根本套戲嘅目標觀眾唔係後生客群!所以與其花力氣罷睇低質素電影,不如用心撐好電影,自由市場,有票房就有場次,自然長做長有。