周梓盈天台企跳 楊明救人驚動消防

東方日報
楊明飛身救人!

藝人楊明「英雄救美」,在尖沙咀一座大廈天台「勇救」周梓盈時驚動警方及消防,認真大陣仗!他透露現實生活中試過心急救起遇溺者,後來考得拯溺牌,才知道自己當年行事過於鹵莽!

楊明、周梓盈及蔡國威等,日前在尖沙咀為無綫新劇《網絡騙案》開工。劇情交代有「翻版萬綺雯」之稱的周梓盈遇上詐騙,一時想不通決意跳樓,做警察的楊明在場勸說。

「未試過咁大陣仗!」

周梓盈單靠幾條威吔及工作人員緊拉,就危站9樓的天台「尋死」,放聲嚎哭的她投入拍攝,喊到變花面貓!完成幾個鏡頭後,樓下突然有消防車嚴陣以待,引來大批市民圍觀,同時有重裝備消防員上天台了解,得悉正在拍戲後便拉隊離開,未幾再有警察上樓向劇組了解,期間兩度下起傾盆大雨,拍攝進度略為受阻。

受訪時談到英雄救美驚動警方及消防一事,楊明即靦覥說﹕「途人唔知拍戲而搞到報警係有嘅,不過冇試過今次咁大陣仗,真係唔好意思!(現實生活中有冇救過人?)記得十幾歲時去沙灘,突然發現有救護員向我嘅方向奔跑,原來前面有人遇溺,當時我擔心等得救護員都太遲,就自己游埋去救人,好彩最終冇事。不過後來我考到拯溺牌,知道咁樣做好可能救唔到人,隨時連自己都有意外,以後就唔敢咁鹵莽喇!」他又透露劇集尚餘約兩周就竣工,希望趁再開劇前有數天假期休息充電。

蔡國威拆解騙案

至於蔡國威表示今次與楊明等齊齊演警察,片場笑聲不絕:「大家圍埋講笑話,對白難講驚甩,又會『互頂』。今次故事參考咗真人真事,當中有啲騙案看似黐線,但依然有人中計,都算見識唔少!」

拍劇搞到有途人報警,楊明都滴晒汗!
周梓盈天台企跳,真係睇見都腳仔軟!
消防隊帶同重裝備上樓,發現虛驚一場。