周柏豪憶述入產房10秒即喊

東方日報

「愛妻號」周柏豪日前在電台訪問中,憶述當日太太入手術室誕女的情景,他說:「入手術室前,我以為自己會駕馭到個場景,但一入到去睇到太太喺手術床上,唔使10秒就喊,嗰刻覺得太太真偉大,甚至個女出生第一刻,我都係望住太太,唔係先望個女。」

柏豪跟太太一起十幾年,除了感謝她為自己放棄很多東西及青春,連好簡單的拖手仔都少,令他覺得虧欠太太,所以每晚瞓覺都會拖實太太的手:「我仲會喺歌度畀佢知道我對佢嘅感覺。」作為新手爸爸,他坦言沒有不習慣,甚至很享受,並說:「喺屋企我會幫BB沖涼、換片、剪指甲,有啲人怕污糟,但我覺得正。」他指囡囡像他們兩公婆般愛笑,而且很似古人,會叫他做「爹」而不是「爸」。