【呢兩集好催淚】《降魔的》馬國明演技大爆發 獲網民推舉做視帝

馬國明拍劇多年,一直同視帝名銜無緣。不過最近佢喺台慶劇《降魔的》嘅表現令人眼前一亮,成功得到觀眾一致讚賞,網民仲話要捧佢做視帝。

劇中馬明飾演嘅麻甩宅男的士佬做得入型入格之外,呢幾晚嘅劇情簡直令佢演技大爆發。

劇情講述小馬(馬國明飾)到力哥(金剛飾)同力嫂(小儀飾)所開嘅麵鋪,後來發現佢地係鬼而唔係人,因為心事未了而唔肯離開人世。小馬本來諗住幫佢地搵返個仔,點知發現自己就係佢哋嘅親生仔。

意外見到當年麵鋪火災情況,要親眼睇多次父母點死,仲要自己無能力救返佢地,馬國明嗰刻啲眼淚大爆發,嗰種無力感打動好多觀眾。噚晚嗰集小馬去九龍仔公園見到力哥力嫂同細個嘅自己,一家人好開心咁玩。當力哥問小馬佢爸爸媽媽喺邊嘅時候,小馬就話佢哋去咗好遠嘅地方,仲話佢哋間唔中都會見面。喺呢一段馬國明嘅感染力真係一發不可收拾,相當催淚。

網民都激讚馬國明嘅演技令觀眾另眼相看,希望佢多年努力能夠開花結果,仲有網民話佢絕對勝任做視帝。

大家又覺得馬明有冇機會憑《降魔的》成為視帝呢?定係又會坐喺旁邊,O咀睇人攞獎?