吳若希「復仇」夢碎 菊梓喬冧莊歌后 贏晒!

東方日報
菊梓喬連掃6獎,完勝!

「宿敵」菊梓喬和吳若希在勁歌頒獎禮上再次埋身惡鬥,結果菊梓喬冧莊再奪「最受歡迎女歌星」,狂掃6獎成為終極大贏家,完勝只得3獎的吳若希!周柏豪憑劇集《多功能老婆》的「暖男」角色,勢如破竹包攬5獎,不單首圓「最受歡迎男歌星」夢,同時令視「金曲金獎」為囊中物的譚嘉儀大熱倒灶!

《2019年度勁歌金曲頒獎典禮》昨日在將軍澳電視城舉行,共頒發48個獎項,逾30位歌手出席。全場焦點是惡鬥逾兩年的「死敵」菊梓喬(Hana)與吳若希(Jinny)再次同台一較高下,穿透視裝的Jinny一副戰鬥格,將穿樽領衫的Hana比下去,似乎對重奪「星夢一姐」寶座充滿信心。不過,行大運的Hana全晚不斷上台攞獎,除了奪得「唱片銷量大獎」及3個「勁歌金曲獎」外,尾段更第2度奪「最佳演繹女歌星」,本以為Jinny大有機會奪「最受歡迎女歌星」,結果卻由Hana冧莊擸埋,最終掃6獎成為大贏家,令只捧3獎的Jinny重奪「一姐」之位夢碎。

Jinny失獎擰歪面

Hana致詞時全程哽咽:「上年到今年發生好多事,做咗好多自己想做嘅嘢,多謝公司、老闆、音樂班底。」又眼濕濕多謝粉絲:「如果唔係你哋,好多嘢都未必堅持到,希望以後一齊同行。」台下的Jinny雖有拍手「贈興」,但又擰歪面與身旁的胡鴻鈞傾偈,似乎「冇眼睇」。

男歌手大贏家則是掃走5獎的周柏豪,他早前在《萬千星輝頒獎典禮》憑《多》劇奪得「最受歡迎電視男角色」及「最受歡迎電視歌曲」獎項,在昨日的頒獎禮同樣勢如破竹,獲頒「唱片銷量大獎」、兩個「勁歌金曲獎」,更首嘗「最受歡迎男歌星」及「金曲金獎」滋味!有人歡喜有人愁,賽前憑《Can You Hear》被視為「金曲金獎」大熱的譚嘉儀,最後只得兩個「勁歌金曲獎」及「最受歡迎網絡歌星」獎。成績緊隨其後的有鄭俊弘、石詠莉、林穎彤、胡鴻鈞、王浩信等,各得兩獎。

泳兒玩火出事

頒獎禮上發生小意外,獲頒「勁歌金曲獎」的泳兒演繹得獎歌曲時,身邊的Dancer玩火把觸發「火警」,燒着背脊及令地板着火,幸而很快被撲熄,工作人員隨即上前清潔和換地板。

Jinny賽後受訪時分享失落「最受歡迎女歌星」的心情:「唔拎啦!太大壓力,自己唔係好守規矩嘅人,怕上到台控制唔到自己,所以呢啲情緒問題就交畀其他人承受啦,我喺台下開心過喺台上面。」問到是否將一姐之位拱手相讓予Hana?她說:「我都未做過一姐,攞過先係,喺我心目中,佢永遠係一姐。」講到Hana上台領獎時,她擰歪面?她解釋:「其實我同胡鴻鈞Plan緊慶功宴有咩食,睇吓有冇鮑魚食。」至於大贏家Hana表示:「冇諗過會冧莊,講真今次冧莊真係有壓力。(驚同Jinny比較?)唔驚,唔緊要啦!(穩坐『一姐』之位?)冇『一姐』,係你哋嗌啫!」

吳若希未能重奪「一姐」寶座,唔知有冇嬲豬?
柏豪成為男歌手大贏家,大讚囡囡腳頭好!
譚嘉儀的《Can You Hear》熱爆,可惜未能捧走「金曲金獎」。
泳兒獻唱時Dancer在旁玩火,意外燒着地板。