吳若希關懷老友記 全家出動派口罩

東方日報
很多獨居長者缺乏口罩,吳若希覺得更應幫助老人家。

疫情持續,口罩物資短缺,善心爆棚的吳若希與老公不忍老人家冇口罩用,昨日一家三口到佛堂派發一千個口罩及飯盒給百位長者。而印度裔藝人喬寶寶亦與居港同鄉,免費派1萬個口罩給「老友記」,兩位藝人不約而同齊齊送暖!

歌手吳若希(Jinny)一家三口昨日戴上口罩,到佛堂派口罩及飯盒給在場約一百位老人家。其中Jinny與囡囡淼淼同樣紮上孖辮,以「母女Look」上陣,兩人負責派飯盒,淼淼十分精靈,派飯盒給老人家時完全不怯場,眼仔睩睩,氹得老人家很開心,而老公Alex就負責派口罩。

做足防疫 撲搓手液

Jinny透露每年新年都會與老公到佛堂派齋或禮物給獨居長者,今年老公見到很多獨居長者沒有口罩,特別張羅口罩送給他們,但為免引起混亂,沒有公開此事,希望低調進行。她指口罩由老公捐出:「因為貨量唔多,喺唔同渠道搵,買咗大約一千個口罩捐出嚟畀長者。(搵口罩期間有冇遇到困難?)好彩其他朋友幫手搵,今次係啲藥房朋友成本價讓出嚟畀我哋。(花咗幾多錢?)近5位數。」

她指家中夠口罩用,亦有做足防疫措施:「要搵消毒搓手液,唔係買咗好多,屋企一家七口一人一支,一支都夠用長時間。」又說這段時間盡量不出街:「咁耐以嚟,個女都係第一次出街,佢每日都喺屋企睇書。(有冇扭計要出街?)又冇,佢對出街唔係特別有興趣,同埋屋企有充裕嘅活動畀佢,之前買咗啲貼紙書畀佢學吓數學。」今次第一次帶囡囡出來派飯,想讓囡囡知道老人家生活困難:「派飯盒畀老人家,係想教佢自己有能力,就可以幫吓人。」

工作方面,Jinny直認受到影響:「今個月有好多Annual Dinner取消咗,本來4、5月會出Trip拍旅遊節目,依家取消或延期。(損失幾多錢?)唔使咁計,最緊要安全。」月底她將與幾位歌手前往馬來西亞開騷,逗留兩日,問到老公可會擔心?她笑言:「我識得照顧自己,只係擔心有啲咩唔乾淨、污糟嘢會帶返屋企,所以返屋企前一定要做足清潔措施。」其夫日前生日,她表示沒有出街慶祝,笑言:「喺屋企食個食剩嘅蛋糕。(仲有冇預備咩畀佢?)我唔想花心思喺佢度。」

喬寶寶不忿商人無良

另方面,印度裔藝人喬寶寶昨午亦與居港的同鄉於佐敦免費派發1萬個口罩給65歲以上的長者,每人可得一包五個裝的口罩,約45分鐘派完。現場逾數百人受惠,並向身穿「I LOVE HK」的寶寶致謝,他說:「唔忿氣有無良藥房趁疫情炒高幾倍價錢嚟賣,所以特別想幫基層長者,佢哋環境麻麻哋,抵抗力都弱啲。」

他覺得助人不分種族,呼籲更多人從不同渠道獲得物資,可捐贈給有需要人士。

吳若希一家三口昨日到佛堂派口罩及飯盒給老友記。
吳若希外出回家,必定做足防疫措施。