吳若希性感輸師妹瞓身痛到癲

東方日報
吳若希露肉浸溫泉收視都不似預期,索性只騷美腿。

吳若希(Jinny)在「優秀選」中晒42吋長腿,卻不敵性感師妹譚嘉儀及林穎彤,Jinny笑言毫不保留大晒強勁事業心,為了無綫旅遊節目收視,就算Pat Pat痛到癲都撐到底,又終極性感浸溫泉,更揚言以爭取做一姐為目標!

前晚「勁歌金曲優秀選第二回」在電視城進行錄影,得獎的Jinny、曾樂彤齊齊晒靚腿,但論吸睛度就輸給露得更多肉的譚嘉儀及林穎彤,Jinny認輸話讓賽:「留番畀佢哋性感,我做咗媽媽錫身啲!」但她在《森美旅行團3》節目卻搏到盡,玩長滑梯整親Pat Pat,痛到癲都負傷上陣拍枕頭大戰兼堅持到底,又與麥美恩肉帛相見浸溫泉,可惜期望不似預期,其性感Look竟不及薛家燕回響大。

露肉都唔夠男人嚟

她說:「原本希望呢輯收視挽回聲譽,估唔到今次去到咁盡、出埋聲都係冇收視,輸畀玩相撲,我同麥美恩冇乜可以再露,大哥(森美)年紀都唔細,再唔露冇得露,畀佢同丁子朗叻吓、威吓啦!」又說出席音樂頒獎禮比台慶更認真,問到打算橫掃獎項重奪「一姐」地位?Jinny謙稱一直都不是「一姐」:「應該係話爭取個『一姐』返嚟係我目標,雖然喺《森3》嗰個青花瓷造型令歌手生涯咁上下,但唔好跌到『尾一姐』位置就得。」

李靖筠攞獎被肯定

同場首次得獎的李靖筠(Gladys)覺得攞獎像被肯定。睇好師妹的曾樂彤去年得新人大獎,笑言:「新人獎冇得攞第二次,或者下年我組個組合,再報新人獎。」另外,跳唱組合BOP天堂鳥的成員許俊豪(Lincoln)早前練後空翻跌斷右手,只見其右手手腕戴上保護套,但留有5吋疤痕,他說傷處仍腫痛:「發生意外嗰陣承受咗80公斤嘅體重,呢個位裏面縫咗30針,人生第一次咁重傷。」稍後會繼續帶傷跳唱,口沒遮攔說:「可能跳一次,斷一次。」

譚嘉儀呢身造型搶Fo成功。
李靖筠(右)與曾樂彤玩透視。
天堂鳥的許俊豪(左)展示傷疤。
林穎彤(右)行性感、戴祖儀Sell青春。