吳若希冒險扮靚死忍購物癮

東方日報
吳若希最愛Shopping,但最近唔敢行街,冇得掃貨!

歌手吳若希是「天生購物狂」,但新冠肺炎肆虐下,日前她冒險往中環髮型屋扮靚後,連街都唔敢行,急急腳返歸!

吳若希(Jinny)與老公何兆鴻育有一女,她曾自爆最愛購物,早前到東京拍節目時,趁機為自己和囡囡瘋狂置新裝,買到唔停手!不過,近月新冠肺炎肆虐,「行街精」Jinny沒工作在身,就與囡囡閉關在家不敢外出。日前她趁空檔往中環整頭,雖然購物癮發作,但亦不敢四處逛,扮靚後急急腳返歸!

齋望唔敢入店

當日下午約二時,戴口罩的Jinny獨自現身商場,邊行邊講電話,匆匆步入附近的髮型屋。她全程「十級戒備」,坐下後連口罩亦不敢除下,更不時以酒精搓手液清潔雙手,逗留約兩小時後離開,臨走前在店內揀了幾支護髮用品。她去等車期間途經名店,明顯身痕的她不停注視櫥窗新裝,卻死忍不敢入內。見她等車期間低頭族上身狂撳電話,似是向老公報到,之後箭步上車,趕住回家湊女。

記者事後聯絡Jinny,她透露當日只是去染髮:「近排一直要開工,趁嗰日得閒咪即刻去整頭。我冇四圍行,買咗啲護髮用品就即刻返屋企喇!」

吳浩康唔戴罩噴口水

另一邊廂,去年底與「咪神」崔碧珈分手的吳浩康,當日亦在街頭等的士,不過似乎不太擔心疫情,未有戴上口罩防護。他上的士後發現記者,懶理口水四濺,即時校低車窗揮手打招呼。

Jinny染完髮就嗱嗱聲返歸,避免在街上多作停留。
吳浩康連口罩都唔戴,咁勇?