吳業坤酒後爆粗鬧高Ling

東方日報

歌手吳業坤於無綫節目自爆曾於劇集《法網狙擊》慶功宴上,因飲醉酒爆粗鬧高海寧(高Ling),令全場嘩然,幸大家都當他「細路仔」沒有責怪,為表歉意,他認真地向對方鞠躬致歉,高Ling則指已忘記對方爆粗,笑言自己做朋友一流,不會記仇。

吳業坤於汪明荃主持的節目《娛樂大家》爆料,指自己當年在慶功宴上因影相問題,曾爆粗鬧高Ling:「當晚一班同事影緊自拍照,我走去攝位,高Ling好自然咁叫我行開,我就爆粗鬧佢。」汪明荃問他是否經常講粗口?他說:「當日係我第一次出席劇集慶功,同啲前輩飲咗啲酒醉咗,講完大家都愕咗然。(咁有冇怪你?)冇,當我小朋友飲醉咗。」他還在鏡頭前鄭重地向高Ling鞠躬致歉,還指對方拍劇時經常載他坐「順風車」,感到很不好意思。

零印象唔記仇

對於吳業坤真誠致歉,高Ling昨日回應指對方早前已跟她說過,但她一點印象都沒有:「我完全唔記得有咁嘅事發生,我呢啲朋友幾好,人哋對我做完衰嘢,都一啲印象都冇。」

節目中擔任「娛樂家族」成員的林穎彤亦玩爆料,指跟吳業坤拍攝《法》劇時,對方曾在休息室唱歌給她聽,吳業坤則自爆曾送「一條嘢」給她,之後才講清楚是叉電線,但林穎彤稱已忘記,更指拒絕過他。

被「攻擊」標冷汗

有份拍該劇的森美就指林穎彤當年曾呻過吳業坤經常跟住她,被連環爆料的吳業坤即狂標汗,要身旁的黃智雯抹汗。

林穎彤昨日受訪時笑言只為搞氣氛,並指對方沒特別出冧招,電話線亦不止送她一人,至於拒絕對方,她笑言:「佢冇表白o架,只係冇理佢嘅口花花。」