吳日言妊娠糖尿入院4日崩潰

東方日報
患上妊娠糖尿的吳日言,現時要照指示自行打針。

懷孕數月的吳日言突然爆出患上妊娠糖尿,入院4日悶到發癲,嚷着要出院,好在有老公安慰及陪伴,儘管只可以飲清水和戒甜食,但都會為BB忍耐落去。

藝人吳日言(Yan)預產期為今年12月,昨日她在社交網發文自爆血糖過高,更為此入院4日:「話說前幾天在醫院住,留醫觀察血糖指數,去到第4日,真係崩潰,再唔出院我真係會發癲,因為喺醫院真係好悶好悶。」又透露現時已出院,會依照指示自行打針,直至BB出世,囑咐歌迷不用擔心。

老公頻撲

Yan接受本報電話訪問,直言日前留院時情緒激動:「行得走得困住喺醫院好慘,去到第4日好唔開心,真係太悶!其實嗰日醫生話夜晚走得,但嗰時頂唔順,好激動!姑娘問我係咪好擔心,其實唔係,我接受自己係妊娠糖尿同自己打針,只係想快啲出院。」幸好有老公陪伴:「老公一日兩次嚟探我,好頻撲,唯一樂趣係佢陪我。」

她透露仍在試藥階段,每日要為自己打針:「希望快啲調校到藥嘅分量,情況就穩定。其實醫生怕過量藥搞到血糖低會暈,依家戒咗甜嘢,食嘢清淡都超標,可能要調高啲。」現時她只能飲水、清茶及鮮奶,平時好鍾意的朱古力等甜食現在都不能吃。

打針唔騰雞

她又表示朋友建議記錄低每日打針情況,讓將來小朋友知道她當時多辛苦,惟她不會刻意這樣做,因為不關BB事,而是身體變化才有這個病。不過,朋友亦告訴她生完就會病愈,對此當學多樣嘢,現時自己打針亦不會騰雞。