吳卓羲恨拍拖跳Step生仔先!

東方日報
雖然仲未有對象,但Ron媽就好心急抱孫!

吳卓羲與蔡潔及余香凝兩位後輩合作熱播劇,大讚她們專業得嚇到他,又笑言要多謝樂易玲,令他與蔡潔有咀戲享艷福。40歲的他坦言恨拍拖,現時靜待緣分,但笑言因媽媽「催生」,可以跳過結婚這一步!

吳卓羲(Ron)主演劇集《飛虎之雷霆極戰》下周進入結局篇,今次再與苗僑偉、黃宗澤等合作,更有好友馬國明加盟,Ron說:「咁多年嚟睇住大家成長、進步、經歷,以前大家仲好幼嫩,依家就成熟咗,合作得好開心,戲內戲外打成一片。」

開工有艷福要報恩

提到與蔡潔、余香凝首次合作又有感情線,他大讚兩人專業:「專業到喺現場唔出聲,專業到我都驚!可能有啲重要場口要培養情緒,所以唔會打擾佢哋。」劇中與蔡潔談情,亦有蜻蜓點水式的親吻戲,他笑言不知道要如何報答樂易玲,因為每次都可以與不同靚女合作。

50歲添丁未算遲

提到已單身一段時間,Ron坦言恨拍拖:「疫情冇得出街識女仔,但到開工時就冇時間。(咁搞法好難拍拖?)未必嘅,可能緣分到擋都擋唔住。」好友陸續結婚生仔,他笑言想不到林峯進展神速:「就係緣分一到,想發生就發生。」問到如果遇到合適對象,是否隨時結婚?他笑說:「生仔先啦!阿媽講(口架)嘛,佢話我唔係好得閒結婚住,生咗仔先。(佢有冇催你?)講過兩次,佢知我工作好忙,話冇時間拍拖,但有時間瞓覺喇啩?叫我生咗仔先。」

問到自己能否接受生仔先?Ron笑說:「咁都要有緣分識到個女仔、認清楚佢先得,求其咩?如果唔係同借種有乜分別?(即係要一步步嚟?)跳咗結婚個Step,其他一步步嚟!」雖然已40歲,但他認為時間不是問題:「4字頭好年輕啫,50幾歲先生小朋友都得!」

Ron靜待緣分,期望早日遇上另一半。