吳千語讚生活健康 陳庭欣恨鬥戲

東方日報
吳千語讚張達明樂於提攜後輩。

近年張達明電影產量不多,但跟他合作過的藝人均對他有讚無彈!吳千語與陳庭欣早前與他合作《家有囍事2020》,千語與達明飾演老夫少妻,她大讚對方健談,生活很健康:「私底下佢有同我傾偈,原來佢之前住喺我屋企附近。除咗做嘢,我知道佢生活好健康,每朝去海濱公園跑步,好佩服佢,咁有自律性。仲有,佢係一個好開心同正面嘅人,令我可以喺一個好輕鬆嘅環境下拍戲,希望將來有機會再合作。」

而陳庭欣雖然與達明沒有對手戲,但曾在首映禮後的飯局聚頭,她說:「我第一句同佢講係『我細個好鍾意睇《狀王宋世傑》』,講完之後,有啲擔心講錯嘢。(驚佢誤會話佢老?)佢非常Nice,之後我再加句,其實我媽咪都好鍾意睇。」對於達明大病後經常發放正能量,陳庭欣表示很欣賞:「絕對係敬佩同支持,希望有機會合作,電影、電視或舞台劇都好,唔知佢有冇興趣返TVB拍劇呢?」

陳庭欣小時最愛看《狀王宋世傑》。