吳千語同富三代築3千萬愛巢 擬出年拉埋天窗

恭喜晒呀!

林峯舊愛吳千語跟家族資產逾百億嘅「富三代」施伯雄翻撻,兩口子成日喺社交網低調放閃,感情愈來愈穩定。唔經唔覺千語BB已經26歲,據知施伯雄已準備好出年迎娶「BB」,仲喺舊年年尾一擲3,000萬喺清水灣傲瀧,購入1,800呎豪宅。有埋新婚愛巢,千語BB幸福爆燈,一啲都唔輸蝕畀林峯呀!

千語BB着住婚紗好幸福呀!
同施伯雄好事近。

其實千語BB已融入施伯雄家中,又同佢嘅朋友圈稔熟,就算兩口子去公園拍拖,千語都係坐自己原名吳欣容登記嘅名車,弔詭係呢駕車登記地址就係施伯雄嘅南灣豪宅,有車又有樓,千語BB依家只欠一紙婚書。

傲瀧示範單位~
三邊落床冇問題啦!
會所泳池~

施伯雄真係好錫BB,據知,愛巢裝修落重本,屋內大玩歐陸風,又有大浴缸方便鴛鴦戲水,佢知BB鍾意煮嘢食,就連3萬蚊一個焗爐眼都唔眨就買咗。不過依家因為疫情關係,二人婚期最快都要等到出年下半年,千語BB依家可以學定做人妻都得喇!

千語BB學做人妻!