吳剛師傅將為《東華》出山表現 齊齊重溫佢嘅經典亡命表演

一年一度嘅無綫籌款節目《歡樂滿東華》將於本月7日(星期六)播出。只要講到《東華》嘅經典表演,大家都會好自然諗起「台柱」吳剛師傅,當年嘅表現真係好精彩,睇到觀眾目定口呆。不過佢喺2000年《東華》後,佢已淡出娛樂圈多年,仲曾經投身飲食界,而家就主要喺內地工作。噚日就有消息指無綫為救收視,所以就搵嚟闊別《東華》多年嘅吳剛師傅出山,再次上台表演。而家就同大家重溫吳剛嘅經典表演啦!

食炭(big big channel截圖)

1990年係吳剛師傅第一次施展奇技,佢喺表演中食咗十幾粒熱辣辣嘅炭。

滾油中徒手拎物件(big big channel截圖)

節目組一早準備咗一鑊滾油,吳剛師傅運功後就徒手喺滾油中拎起石獅子及多個金元寶。之後,佢為咗籌多啲善款,佢仲直接飲咗一杯滾油。

瞓玻璃(big big channel截圖)

除咗食炭飲滾油之外,吳剛師傅仲有好多奇技。喺1992年,佢就表現咗插尖箭喺身上,然後運功將箭折斷;之後佢仲瞓喺玻璃上面,再搵架車喺佢身上壓落去,真係睇到都覺得好牙煙呀!

心口碎大石(big big channel截圖)

心口碎大石亦係吳剛師傅其中一個超級經典嘅表現,喺1993年吳剛師傅除咗以頭及耳碎磚頭之外,佢仲瞓喺玻璃上玩心口碎大石。

鐵馬奔騰(big big channel截圖)

喺1994年嘅表現中,吳剛師傅可能知道大家睇完瞓玻璃,然後被電單車轆過會覺得佢新意欠奉,所以就搞搞新意思就係佢俾四架電單車綁住啲手腳,然後向四邊拉扯,之後再喺背部加釘板,上面企住李婉華,然後再瞓喺玻璃上。

纓槍插身(big big channel截圖)

喺1996年,除咗摸熱鐵鍊及脷舐熱鐵之外,吳剛師傅仲搵咗多支纓槍插向身體,然後再喺背脊碎磚頭。

以上咁多個表演,唔知邊個令你印象難忘呢?