【否認戀愛中】陳思銘強調與唐詩詠只係好朋友關係

陳思銘

「不能錯過的女友」唐詩詠近日經常出現娛樂版,除咗與馬國明感情一直傳得熱哄哄,佢仲與另一位「知己」傳出緋聞,佢就係有「教育界王力宏」之稱嘅陳思銘(Samuel)。

年紀輕輕嘅Samuel,佢就絕對唔係富二代,仲要係白手興家,一手一腳建立自己事業王國。有報導指陳家世世代代於流浮山賣海鮮,Samuel爸媽好早期已經俾Samuel去外國交流團,之後去英國讀書。由9歲前往英國讀書直至碩士畢業,幸好Samuel一直冇白廢父母栽培心機及金錢。而當好多年輕人自己到24歲仍未知自己前途去向嘅時候,Samuel就已經開始開辦英識教育搞升學顧問生意,因應移民潮及現時社會需求去協助好多學生與英國嘅中、小學校配對,一辦就辦到現時。

英國修讀經濟嘅佢,雖然並未繼承家族生意,不過就建立一個屬於Samuel嘅教育王國。自己嘅升學顧問生意現逐漸上軌道,生意仲好唔錯添。Samuel由一開始拎咗數十萬投資呢間公司,到2017年有私募基金入股,當時公司已經滾到估值8千萬元,Samuel都直言自己希望可以變為上市公司。

藝人忙拍劇,自己忙教育王國,大家真係想拎一個私人時間出嚟都難,所以Samuel對記者講述與詩詠關係只係好好朋友。由於自己單身嘅關係,所以都冇避忌去與唔同女性行街食飯行山等活動。至於忙於事業嘅Samuel,仍然好恨拍拖,佢希望可以搵到一個既合眼緣又能溝通到嘅另一半,不過最想嘅要求係要對方可以過埋「未來奶奶」呢關,因為Samuel仍然同緊媽媽居住,所以另一半除咗錫自己,仲要錫埋佢屋企人。

唐詩詠