同FYY激咀成分手導火線?張頴康:好難接受

張頴康都話愕然!

藝人馮盈盈今早宣布與男友結束4年情,雖然「再見亦是朋友」,但回看她之前每提男友未能接受其演藝工作上的新嘗試,如她於劇集《解決師》中與張頴康一場超激浴室親熱戲,她直言當時男友睇到尖叫並心靈受創。

對於盈盈的擔憂,拍檔張頴康回覆東網時坦言明白:「佢分手我都覺得愕然,兩人冇辦法行落去當然可惜,早兩日見過盈盈都唔覺佢情緒有咩唔同,但都希望佢冇事!至於佢男友未必接受盈盈喺工作上可能跟唔同男演員有情慾戲,我作為男性,當然明白,尤其佢男友係圈外人,係好難接受,坦白講,我同盈盈場《解決師》親熱戲,老婆睇完口話冇嘢但個心都唔舒服,換轉我係盈盈男友,睇到都唔開心,係會有影響!圈外人唔會明白我哋嘅感受,你哋睇到畫面上好似好Enjoy,其實係好痛苦,仲話女演員另一半睇到,就更辛苦,因為唔知下次女友會同邊個男演員有親熱戲,我好明個感受!(安慰佢?)要讚佢添!佢作為女藝員,又係港姐冠軍,正上位中,佢嘅行徑咁保護男友,夠透明又唔收埋,我好欣賞佢,不過,佢剛分手,如果仲要繼續開工,冇畀私事影響到身邊同事,其實佢都好辛苦,我覺得佢已經好專業,希望大家畀啲空間佢,等佢盡快過度呢個難關!」