【各有支持者】細數無綫入屋新聞主播

無綫除咗演藝事業精彩之外,其實都捧紅唔少新聞主播。主播通常都比較易入屋,亦得到好多廣告商垂青。咁呢班入晒屋嘅主播,佢哋之後嘅發展又係唔係一樣咁入屋呢?

張文采

張文采喺日前正式告別服務咗10年嘅無綫,不過佢最為人熟悉嘅唔係報道新聞,而係佢同藝人羅鈞滿嘅一段舊情。加上佢外貌清秀可人,靚女主播當然深受觀眾歡迎和愛戴,佢嘅告別令唔少網友都大表不捨,張文采接受傳媒訪問時就未有透露之後去向。

趙海珠

花名「珠珠」嘅趙海珠,主播生涯雖然只有短短三年,但係就令人留下深刻印象!2006年離開無綫新聞部,之後轉戰財經界及地產界,擔任銀行高層。除咗時不時受訪,上鏡做銀行生招牌之外,同時亦有撰文寫專欄,離開主播台依然活躍。

方健儀

方健儀一路都係無綫晚間新聞嘅王牌主播,2012離開無綫新聞。佢嗰句「多謝支持,後會有期」眼泛淚光咁向觀眾道別,令好多人都印象深刻。結束多年主播生涯後,佢轉到廉政公署擔任高級新聞主任。2014約滿離開,轉行做皮革手作,同時亦做埋電台節目主持人,仲返學校執教鞭教書,實行多線發展!雖然冇做主播,但佢經常喺網絡同觀眾互動,有「最貼地」主播嘅美譽!

柳俊江

「柳爺」柳俊江高大靚仔,故被形容為「大鼻子情聖」,曾與羅暉翔、潘蔚林、胡天衡等男記者一度成爲少女偶像,並有「新聞王子」之稱。柳爺一直關心時事,最近喺元朗襲擊事件中受傷,遭人打至血流披面引起唔少人關注。離開無綫後,柳爺投入動物保育和環保工作中,同時亦係電視主持、專欄作家、廣告導演、評論員等等,最近仲創立咗購物網站真係百足咁多爪。

方東昇

方東昇係上述幾位入面,唯一一位仍然留喺無綫新聞部嘅人。前幾個月仲獲無綫頒發傑出員工獎添!佢喺98年加入無綫新聞部擔任實習生,至今已經晉升為策劃主任。有「中大才子」美譽嘅佢,精通普通話、日文、俄文、德文及荷蘭語,佢負責嘅節目《世界零距離》同《長命百二歲》都好評如潮,方東昇喺節目入面曾分別以流暢荷蘭語及德語採訪荷蘭首相馬克•呂特和德國總理安格拉•默克爾,充分展露其語言天賦,加上佢生動嘅旁白,不斷爆出金句,為節目生色不少,深得觀眾愛戴!