台慶風光不再?錄影形式播出零氣氛網民紛紛嗌悶

台慶係無綫一年一度嘅大型節目,今年除咗改咗名做《珍惜香港 發放娛樂 TVB 52年》之外,仲一改以往直播形式,變成錄影節目喺噚晚播出。雖然有超過160位藝員參加,不過由於節目係錄影嘅關係,氣氛欠奉,唔少藝人嘅笑容都頗為牽強。節目準備咗好多精彩環節,例如跳舞、唱歌、真假遊戲及猜皇帝,希望可以吸引觀眾收睇,不過可惜帶嚟無數負評。

台慶現場

之前無綫已經試過喺《萬千星輝頒獎典禮》中安排藝人吃炸雞環節,結果狠批係植入式廣告兼被罰款。今年就冇吃炸雞,不過就搵咗司儀陸浩明同麥美恩用幾分鐘時間,落力硬sell自家購物頻道嘅產品,真係睇到觀眾眼都突呀!

台慶現場

節目中有唔少唱歌跳舞環節,無綫除咗安排一批新力軍上台跳舞之外,仲有高海寧、王君馨、張曦雯及陳曉華等人嘅精彩跳舞表演,佢哋嘅歌難度表演要優雅有優雅,要性感又有性感,都可以話係全晚最精彩、最吸引嘅環節。

台慶現場

冇咗往年嘅台慶趣劇,今年就有黃翠如、蕭正楠、曹永廉及洪永城嘅「真假遊戲」,佢哋會分享一啲關於佢哋嘅小故事,之後叫大家估係真定假。黃翠如期間自爆睇過洪永城全相,仲話佢嘅size係手指尾咁短。而蕭正楠亦爆出自己喺初入行嘅時候係同志榜嘅榜首。雖然睇得出佢哋已經好努力嘗試搞笑,不過一班網民就唔係好受落喇,紛紛留意話:「難得四條友表現得出講得出,低俗下流又唔好笑」、「仲以為自己好好笑」、「呢part cheap到不得了」及「好無聊」等等。


另外,無綫仲安排咗藝人玩「包剪揼」贏鑽石、二選一快問快答及最後嘅抽獎環節等等,不過唔少網民睇完都認為節目內容悶到爆,仲紛紛留言話:「支持唔落,真心悶」、「以往都難睇,但全晚都找到一part半part收貨,今年真係冇」、「成晚唔知做咗啲d咩!」、「成晚編排邊個諗架。咁X悶都有」及「悶到爆 完」等等。

台慶現場