台慶劇及綜藝節目名單塵埃落定 有冇邊個吸引到你?

每年11月就係台慶月,無綫都會推出大製作或大卡士嘅劇集做台慶劇,同埋精彩嘅綜藝節目。早前網上傳出好多唔同嘅消息,而前晚終於塵埃落定,無綫播出台慶劇嘅預告,分別係楊千嬅及周柏豪做主角嘅《多功能老婆》、黃心穎及張振朗擔正嘅《牛下女高音》,同埋王浩信及唐詩詠主演嘅《解決師》。另外,黎耀祥有份參演嘅內地劇《鳳弈》都會喺10月播出,不過就唔係台慶劇。

《多功能老婆》

《多功能老婆》成功邀請闊別無綫劇集多年嘅楊千嬅做女主角,一向被視為台慶劇嘅大熱,不過早前因為楊千嬅及周柏豪喺社交網站發布嘅言論引起內地網民不滿,所以就傳出劇集押後到起碼下年4月先播出。不過劇集日前獲放生,重新成為台慶劇之一。而《牛下女高音》雲集一眾老戲骨,本來都有唔少人期待,不過因黃心穎嘅「安心偷食」事件慘變倉底劇。劇集日前終於翻生,仲定喺10月7日8點半出街。另外,時裝警匪劇《解決師》就由王浩信及唐詩詠等人主演,劇集就冇受影響,被安排喺10月出街。

《牛下女高音》
《解決師》

至於綜藝節目方面,無綫就似乎冇乜新意,推出5個炒冷飯綜藝節目,分別係黃翠如及洪永城嘅《出走澳洲》、陳貝兒嘅《嫁到這世界邊端3》、鄭裕玲、農夫及余德丞嘅《晚間看地球》、森美及麥美恩等人嘅《森美旅行團》,同埋李家鼎嘅《阿爺廚房》。

以上咁多個節目,有冇邊一套吸引到你呢?

黃翠如&洪永城
鄭裕玲&農夫
丁子朗、吳若希、森美及麥美恩