古惑仔被逼變性組偶像女團 瘋狂漫畫《後街女孩》拍真人版

日本有套好瘋狂、好癲、好黐線嘅漫畫《Back Street Girls》(中譯《後街女孩》),早排睇到動畫版已經好想介紹俾大家,今日睇到真人電影化嘅消息,一定要同大家分享!事不宜遲,睇睇個笑到我抽筋嘅故事先!

故事講述3個黑幫成員(嘍囉級數)一次懶熱血為大佬出頭,有勇無謀咁衝入死對頭地盤,結果無幫到大佬仲搞臭社團個朵。大佬俾2條路呢3位哥仔揀︰一係就切啲器官出嚟賣,一係就去泰國變性,返來接受訓練成為偶像女團,幫老細搵錢!

黑幫大佬就咁成為左團隊嘅作詞人、製作人兼老闆,半途成為明星造手嘅佢有異於正規娛樂公司嘅訓練課程:要三把老牛聲變雞仔聲,就掉佢地入瀑布瘋狂叫,得左!要多啲可愛、多啲女性感覺?3個人型蜈蚣咁互相搓胸,又得左!當然唔少得要一齊住公司宿舍啦,結果3個成為擁有少女外表、古惑仔內心嘅女團「極道少女」,以藝名「愛理」、「真理」同「千佳」出道,仲要紅左!

由於「極道少女」本身係打交多過食飯嘅古惑仔,外表變左少女但時不時流露出陣陣麻甩除,著住短裙仔擘大對脾坐、瘋狂隊酒或者唔覺意爆粗時有發生,今次真人電影幾位女角點樣演譯到呢種內心掙扎又唔作狀,都幾考功夫!變性前嘅古惑仔將由曾參演日劇《明日的約定》白洲迅、電影《超能勁處男》柾木玲彌同電影《變態超人》花澤將人飾演。

原著好笑在尺度奔放、肆無忌憚同接近超現實,最好睇係幾位「女團」內心糾結獨白。真人「極道少女」就由青春女星岡本夏美、《幪面超人EX-AID》松田瑠華同《超人X》坂之上茜飾演,3位女星演藝資歷尚淺,算係新人,演起上來無咁大負擔,希望佢地演得出嗰陣麻甩除,不過女團偶像look就一定過關!