古天樂致電慰問 林子博喜獲ViuTV洽拍劇

林子博話依家工作排到農曆新年。

藝人林子博太太董燕君患有罕見癌症,要負擔沉重醫藥費,日前他又不獲無綫續約,雪上加霜。今日他「失業」後首次開工,為活動擔任主持,問到是否不獲續約後首個工作?他說:「本來唔係,原本之前仲有一個活動,同埋有部電影拍,但因為環境因素取消咗,部電影都開唔成。」

工作排到農曆新年

子博表示演藝人協會主席古天樂有親自打電話給他:「當年我同古仔都係拍卡拉OK,大家已識咗好多年,佢問我ViuTV劇組有冇搵我,ViuTV嘅《地產仔》導演搵我,仲畀咗兩個角色叫我揀,我受寵若驚,同導演講我有得拍已好好,你覺得邊個適合我就拍邊個。」又謂現時的工作已排到農曆新年:「依家每個月都有三個活動工作。(收入好過之前?)咁又未,因為之前有底薪再加外快。」並指因要應付太太的醫療開支,所以希望繼續有多點工作機會。

鄰居贈五位數支票

他又指獲不少人伸出援手,大感人間有情:「身邊好多人好幫忙,好似我住嘅屋苑,個業主立案法團主席平時好惡,成日鬧啲保安,有日佢見到我,話睇到我嘅報道,佢好感性眼濕濕咁畀咗張支票我,叫我自己寫名上去,話係佢小小心意,張支票都有五位數字。同埋落街見到啲商店老闆佢哋都主動同我打招呼,叫我加油。」