反其道而行 5套Netflix負評推介 可以有幾爛?

疫情持續,唔少人選擇留在家中,電視節目無咩㨂,串流平台變得相當重要。近期大熱一定係韓劇《愛的迫降》,利正赫同尹世理呢一對又真係幾好睇嘅!追完呢套劇,不妨喺同一個平台睇下其他作品!

今次唔推介高分作品,反而想介紹其中5套美國爛蕃茄網評價好麻麻嘅Netflix出品,因為好評作品你可能已經第一時間睇咗,不如睇下劣評作品,究竟真係拍得差定係需要平反?

西洋版《死亡筆記》(Death Note) 

      夜神月同L及死神流克嘅鬥智之餘兼創造無罪犯新世界嘅故事,只要知道一個人嘅姓名、樣貌,寫落本「死亡筆記」  度就可以攞佢命!相信香港觀眾耳熟能詳,恨不得有本「死亡筆記」面世,因為大把名可以寫上去!

      雖然原著日本漫畫,不過故事精神跨越地域(制裁壞人!),美國翻拍可以理解。不過觀眾唔賣帳,爛蕃茄網觀眾評分得24%,劣評包括「悶到嘔」、「導演Adam Wingard完全破壞哂原著精髓」、「睇到想自插對眼,夜神月變咗做無腦青少年、L變咗做情緒起伏波而彌海砂好似幾年無沖過涼咁,流克CG九流!」

The Kissing Booth 

       青春愛情劇,講述高中女生要同暗戀對象表白,有新生代演技唔錯,The Act嘅Joey King主演,戲內戲外嘅佢與同片男主角Jacob Elordi都堅係拍拖。本來sweet都暈,仲有唔少小鮮肉曬肌養眼場面,不過評價同另一套青春劇To All The Boys I’ve Loved Before就差天共地,新鮮度得17%!

       劣評包括「過度堆砌浪漫有反效果」、「《恐懼鬥室》浪漫版」、「左抄右抄炒埋一碟」等,不過劣評唔等如低收視,因為套戲已經籌拍續集,証明好多人又要鬧又要睇。

A Christmas Prince: The Royal Baby 

       以聖誕節為背景嘅愛情大團圓喜劇,講述平凡女記者到訪歐洲小國同該國王子共墮愛河,成為皇妃嘅故事。上集講相識兼結婚都仲有50%新鮮度,今集講生仔評分向下得返33%,原因不礙乎劇情娘過《真情》,就算加埋查案劇情都不減套戲嘅肉麻、離地味!

        其實聖誕節電影同賀歲片一樣,都係講好意頭、最緊要大團圓結局,應節電影娘味濃但感覺良好就夠。所以A Christmas Prince系列似乎會繼續拍落去,成為Netflix聖誕皇牌。

《極地》Polar 

呢套評分得19%新鮮度,令人意外!故事改編自人氣網路漫畫,仲話哂有丹麥演技派《誣網》男星Mads Mikkelsen做男主角,,飾演退休殺手,可惜組織嫌佢知得太多,所以搵班後生隊x佢滅口,仲無辜連累鄰居靚女,為咗自己同鄰居條命而重出江湖,大開殺戒!

《極地》似足《殺神John Wick》,Styling都幾有型,不過同時又累咗套戲,因為差評主要原因就係太chok,太多扮哂嘢暴力鏡頭,玩型玩得over咗!

The Last Thing He Wanted 

  呢套上架無耐,新鮮滾熱辣,由Anne Hathaway、Ben Affleck同Willem Dafoe主演,睇cast絕對大片格,條預告片都睇落好得下,不過佢同時示範咗咩係低處未見低,爛蕃茄得7%評分,絕對係爛片分數嚟架喎!電影改編自同名小說,講述記者Elena為圓父親遺願而幫忙完成一單非法交易,過程中發現政府暗地進行武器交易,因為想爆大鑊做獨家新聞而身陷險境。

睇故事格局,似係野心之作,尤其係對美國秘密出售武器予伊朗嘅抨擊。對呢類新聞無咩認識嘅觀眾會睇到一頭霧水,而且眼高手底,電影想講政治又想講人權仲想有埋孝感動天嘅親情,結果樣樣都唔到肉,故事亂哂籠!