【又走一個】入行32年楊瑞麟正式離開無綫

楊瑞麟喺《愛·回家之八時入席》飾演「時生」時天信,令觀眾留下深刻印象。

無綫藝人離巢並唔係新鮮事,不過走吓一個,走吓又一個,搞到劇集嚟嚟去去都係嗰班演員,近日無綫又有一位演員離巢啦,佢就係喺無綫工作32年嘅綠葉演員楊瑞麟。

現年57歲嘅楊瑞麟,喺1987年參加《全能司儀比賽》擊敗黃子華,勇奪冠軍後加入無綫。入行後,佢就被安排擔任司儀工作,唔少大騷都會見到佢,更被指係金牌司儀。不過去到1997年,楊瑞麟因基督教信仰嘅關係拒絕喺《都市閒情》主持風水環節,之後就被雪藏。雖然佢繼續同公司續約,不過就被冷待,主要都係喺劇集中飾演閒角。多年嚟楊瑞麟參演過嘅劇集超過130套,最令大家留下深刻印象嘅應該係處境劇《愛·回家之八時入席》嘅「時生」時天信Wilson。

喺接受傳媒訪問嘅時候,去意已決嘅楊瑞麟就話非常唔捨得,離巢之後未有新計劃,主要係想停一停。佢仲話如果繼續簽落去,只會局限喺一個工作文化,同埋背負無綫藝人身份,出去做嘢未必係咁方便。

《大帥哥》劇照
《十二傳說》劇照